Universiteti i Prishtinës mirënjohje Albanian ICT Awards dhe kandidatëve të saj për promovimin e këtij institucioni të arsimit të lartë
Dje në Universitetin e Prishtinës u mbajt një ceremoni e shpërndarjes së mirënjohjeve për disa prej finalistëve të edicionit të katërt në shenjë vlerësimi për pjesëmarrje dhe promovim të vlerave të këtij institucionit të arsimit të lartë.
Më datë 7 Korrik 2016, në një ceremoni solemne të organizuar në zyrat e Rektoratit të Universitetit të Prishtinës, Rektori Marjan Demaj, shpërndau mirënjohje për Prof. Dr. Blerim Rexha, Shef i Departamentit të Informatikës pranë FIEK dhe fitues i çmimit ICT Akademiku i Vitit 2015, Arta Shehu Zaimi finaliste në Kategorinë ICT Femra e Vitit me projektin jCoders, Arlinda Sheholli finaliste në kategorinë ICT Diploma e Vitit me projektin e-Health për iOS dhe Ilir Murturi finalist i kategorisë ICT Diploma e Vitit me projektin Improving Quality of Election Process using Crowdsourcing Techniques.
Gjatë kësaj ceremonie nderuan me pjesëmarrjen e tyre, Rektori i Universitetit të Prishtinës Prof. Dr. Marjan Demaj, Prof. Ass. Teuta Pustina Krasniqi Prorektore për Zhvillim dhe Cilësi dhe Prof.Asoc.Dr. Naser Sahiti Prorektor për Mësimdhënie dhe Çështje Akademike.
Rektori i UP-së falënderoi profesorët dhe studentët të cilët përfaqësuan Universitetin e Prishtinës në edicionin e katërt të Albanian ICT Awards dhe njëkohësisht u shpreh i gatshëm për të mbështetur dhe shpërblyer të gjithë akademikët dhe studentët të cilët përfaqësojnë dhe promovojnë Universitetin e Prishtinës.
Mirënjohjet për katër kandidatët e Albanian ICT Awards shkuan në shenjë vlerësimi për kontributin dhe arritjet e tyre të dalluara në fushën e teknologjisë së informacionit dhe promovimin e Universitetit të Prishtinës.
Duke vlerësuar arritjet e Albanian ICT Awards dhe duke dhënë garanci për një bashkëpunim më të ngushtë në edicionet e ardhshme, z. Demaj foli edhe për reformat në UP dhe ngritjen e cilësisë në arsim.
Rektori shpërbleu me mirënjohje edhe organizatorët e Albanian ICT Awards për kontribut në ngritjen e imazhit pozitiv të Universitetit të Prishtinës në hapësirën mbarëshqiptare.
/Universiteti i Prishtinës “Hasan Prishtina”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English