Të ardhurat nga administrimi i pasurive të sekuestruara dhe të konfiskuara kanë shënuar rritje të ndjeshme në fillim të vitit 2026, duke reflektuar përmirësim të performancës financiare të Agjencisë për Administrimin e Pasurive të Sekuestruara dhe të Konfiskuara (AAPSK).
Sipas të dhënave zyrtare, gjatë periudhës janar–mars 2026, të ardhurat nga qiradhënia kanë arritur në 64.6 milionë lekë, nga 49.2 milionë lekë në të njëjtën periudhë të vitit të kaluar, duke shënuar një rritje prej rreth 31%.
Rritja është e dukshme në të gjithë muajt e tremujorit, ndërsa muaji mars ka regjistruar nivelin më të lartë të të ardhurave, duke konsoliduar trendin pozitiv të fillimvitit.
Sipas AAPSK, ky rezultat lidhet me zgjerimin e kontratave të reja të qirasë, forcimin e mekanizmave të kontrollit dhe monitorimit të pasurive, si dhe rritjen e efikasitetit në menaxhimin financiar dhe operativ.
Lexo edhe: Qeveria premton subvencione për shtresat në nevojë pas rritjes së çmimeve të perimeve
Agjencia thekson se përmirësimi i performancës reflekton një qasje më të strukturuar dhe transparente në administrimin e aseteve të sekuestruara, duke kontribuar në rritjen e të ardhurave që mbështesin më tej institucionet ligjzbatuese.
AAPSK nënvizon gjithashtu se këto të ardhura përfshijnë vetëm qiradhënien e pasurive të sekuestruara dhe konfiskuara, pa llogaritur të ardhurat nga ankandet apo interesat bankare.
Sipas institucionit, ecuria pozitive e tremujorit të parë krijon bazën për një performancë më të fortë gjatë pjesës së mbetur të vitit 2026.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
