Shqipëria dhe Polonia kanë ratifikuar një marrëveshje për sigurimet shoqërore, e cila u mundëson qytetarëve që jetojnë dhe punojnë në të dy vendet të përfitojnë nga njohja e ndërsjellë e viteve të punës. Kjo nismë u hap rrugën emigrantëve shqiptarë në Poloni që, në të ardhmen, të përfitojnë dy pensione, një në vendlindje dhe një në shtetin ku kanë kontribuar.
Lexo gjithashtu: Kina ndalon marrëveshjen Meta–Manus, thellohet rivaliteti global për inteligjencën artificiale
Kjo është marrëveshja e 21-të që Shqipëria ka arritur në kuadër të sigurimeve shoqërore me vende ku ka diasporë, si dhe e dhjeta me vende të Bashkimi Evropian. Ajo konsiderohet një hap i rëndësishëm për garantimin e të drejtave sociale të shqiptarëve jashtë vendit.
Ministri i Financave, Petrit Malaj, theksoi se qeveria mbetet e angazhuar për të zgjeruar këtë rrjet marrëveshjesh me vende të tjera ku jetojnë dhe punojnë shqiptarë, me qëllim sigurimin e mbrojtjes sociale dhe njohjes së kontributeve të tyre.
Aktualisht, Shqipëria ka marrëveshje të ngjashme me një sërë shtetesh, përfshirë Gjermaninë, Italinë, Zvicrën dhe Kanadanë. Fokus i radhës mbetet Greqia, ku jeton një pjesë e madhe e diasporës shqiptare dhe ku negociatat janë në fazë intensive.
Përveç kësaj, autoritetet shqiptare po shqyrtojnë mundësinë e arritjes së marrëveshjeve të reja edhe me vende të tjera si Holanda, Suedia dhe Australia, në funksion të zgjerimit të mbrojtjes sociale për qytetarët shqiptarë në emigracion.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
