Sipas Reuters, Shqipëria po shfaqet si një nga vendet më të mbrojtura nga tronditjet e fundit në tregjet globale të energjisë, falë varësisë së saj të lartë nga burimet e rinovueshme. Ndërsa tensionet ndërkombëtare, të nxitura nga sulmet e Shtetet e Bashkuara dhe Izraeli ndaj Iranit më 28 shkurt, kanë rritur ndjeshëm çmimet e energjisë, Shqipëria ka arritur të zbusë ndikimin falë prodhimit të brendshëm.
Lexo gjithashtu: Instagram mund të mos jetë më falas, çfarë sjell abonimi i ri “plus”
Një rol kyç në këtë qëndrueshmëri luan Lumi Drin, i cili përmes hidrocentraleve siguron pjesën më të madhe të energjisë në vend. I ushqyer nga reshjet dhe shkrirja e borës, sistemi energjetik shqiptar ka përfituar nga kushtet natyrore, duke shmangur varësinë direkte nga tregjet e karburanteve fosile.
Sipas autoriteteve, rreth 90% e prodhimit vendas të energjisë vjen nga hidrocentralet, ndërsa pjesa tjetër mbulohet nga burime diellore, përfshirë parkun fotovoltaik të Karavasta Solar Park. Kjo strukturë ka ndihmuar në mbajtjen nën kontroll të kostove, ndryshe nga vendet që mbështeten te gazi dhe qymyri.
Ekspertët e energjisë theksojnë se ky model duhet të forcohet më tej. Sipas tyre, investimi në energji të rinovueshme rrit sigurinë energjetike dhe ul kostot afatgjata, në një kohë kur shumë ekonomi të mëdha po përballen me rritje të ndjeshme të çmimeve.
Megjithatë, sfidat mbeten. Në periudha me prodhim të ulët, Shqipëria detyrohet të importojë energji me kosto të lartë ose të mbështetet në alternativa të debatueshme, si impiantet lundruese në Vlorë, të cilat kanë hasur kundërshtime nga komuniteti lokal për shkak të kostos dhe ndikimit mjedisor.
Analistët ndërkombëtarë paralajmërojnë se, ndonëse energjia e rinovueshme ka qenë një mburojë efektive në këtë krizë, varësia e lartë nga kushtet klimatike mbetet një rrezik në afatgjatë. Një vit i thatë mund të vërë në provë serioze sistemin energjetik të vendit, duke e bërë të domosdoshëm diversifikimin dhe investimet strategjike në këtë sektor jetik.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
