Shpallen fituesit në finalen e Mbrëmjes Gala të ICT Awards IV -2016 - Business Magazine Albania

Shpallen fituesit në finalen e Mbrëmjes Gala të ICT Awards IV -2016


U shpallën fituesit e edicionit të katërt të shpërblimeve në fushën e teknologjisë dhe informacionit, Albanian ICT Awards.

Mbrëmja e datës 29 Prill kishte rezervuar surpriza të shumta për pjesëmarrësit dhe finalistët e edicionit të katërt të Albanian ICT Awards. Organizuar pranë Hotel Sheraton Tirana, Mbrëmja Gala solli momentin e shumëpritur për të gjithë, shpalljen e fituesve të garës mbarëkombëtare në sektorin e teknologjisë së informacionit.

Tiranë, 29 Prill – Ishte Kushtrim Shala, bashkëthemelues i garës i cili hoqi siparin e Mbrëmjes Gala me fjalën e tij ku ndër të tjera tha: “Jam i bindur se në këtë mbrëmje do të ballafaqohemi me një inovacion plot vlera nga gjithë trevat shqiptare.”

Në këtë aktivitet nderuan me pjesëmarrjen e tyre zv. Kryeministri i Republikës së Shqipërisë, z. Niko Peleshi, Ministrja e Inovacionit, Milena Harito, Nën Kryetari i Bashkisë së Tiranës, z. Arbjan Mazniku dhe Kryetarja e Bashkisë Shkodër, Voltana Ademi.

“Pjesëmarrja e përfaqësuesve të pushtetit qëndror dhe lokal nga Shqipëria dhe Kosova është një tregues i qartë për rëndësinë e Albanian ICT Awards për mbarë komunitetin ICT në trevat shqiptare,” u shpreh kryetarja e Jurisë, Ani Dasho, lidhur me rëndësinë e këtij evenimenti.

Në një fjalë të rastit, zv. Kryeministri Niko Peleshi ushqeu inkurajim tek pjesëmarrësit me fjalët: “Në këtë sallë mund të fshihet sekreti i Shqipërisë që duam të gjithë, i Shqipërisë të gjeneratës tjetër.”

Plot shtatë kategori, TIK Inovacioni i Vitit, TIK Mobiliteti i Vitit, TIK Diploma e Vitit, TIK Ylli në ngritje i Vitit, TIK Shërbimi Publik më i mirë i Vitit, Akademiku i Vitit në TIK dhe Femra e Vitit në TIK – me 21 kandidatë të nominuar mes emocionit dhe shpresës treguan fuqinë e teknologjisë për të përmirësuar zhvillimin social e reflektuar në të gjitha projektet finaliste.

Një sistem e-learning zhvilluar nga Edmond Jajaga nga Dibra e Maqedonisë, pajisje e internetit të gjërave Animus Home nga Fidan Bytyqi dhe një printer 3D ndërtuar nga Rron Cena ishin projektet finaliste në kategorinë TIK Inovacioni i Vitit ku ky i fundit u shpall fitues.

TIK Mobiliteti i Vitit dedikuar i gjithi shërbimeve bazuar në teknologjitë mobile shkoi për Baboon zhvilluar nga Genti Selenica. Të nominuarit në këtë kategori ishin Alen Saqe me projektin “Dantem” dhe Xhulio Mitre me projektin “my Ikub”.

Duke synuar shpërblimin e studentëve të cilët kanë studiuar në fushat e informatikës dhe shkencave kompjuterike, çmimi TIK Diploma e Vitit me të nominuar Arlinda Sheholli me projektin e-Health, Evio Abazi me projektin e asistimit të drejtuesve të automjeteve dhe Ilir Murturi me projektin e përmirësimit të procesit të zgjedhjeve shkoi për Evio Abazin.

Gara ka rezervuar edhe një vend për të rinj kreativë me çmimin TIK Ylli në Ngritje dedikuar moshave nën 18 vjeç. Çmimi shkoi për Bleart Kepuska. Dy finalistët e tjerë ishin Enxhi Hoxha dhe Flatra Thaqi.

Një çmim sugjeruar nga Kryeministri i Shqipërisë, z. Edi Rama, Femra e Vitit në TIK dëshmoi një sukses të vërtetë në adresimin e hendekut gjinor në sektorin e teknologjisë së informacionit ku 30 % e kandidatëve ishin femra këtë edicion. Çmimi u rrëmbye nga Erisa Terolli ndërsa dy finalistet e tjera ishin Klea Mertenika dhe Arta Shehu Zaimi.

Në kategorinë TIK Shërbimi Publik i Vitit ishin plot 5 finalistë nga Shqipëria dhe Kosova. AKSHI, Autoriteti Shtetëror për Informacionin Gjeohapësinor, dhe Bashkia Shkodër konkurruan nga Shqipëria ndërsa Ministria e Punës dhe Mirëqënies Sociale dhe Komuna e Prishtinës konkurruan nga Kosova me çmimet që shkuan për AKSHI me projektin e-Albania dhe Komunën e Prishtinën e-Kiosku.

Në përpjekje për të shpërblyer akademikët për kontributin e tyre të vyer në sektorin e teknologjisë së informacionit, çmimi TIK Akademiku i Vitit shkoi për Prof. Blerim Rexhën. Supriza e lajmëruar më parë ishte një çmim i ri këtë garë, TIK Hulumtuesi i Vitit, i cili shkoi për Dr. Shkëlzen Cakaj.

Edhe pse secili prej projekteve diferencohet nga njëri tjetri në një mënyrë apo tjetër, ato kanë një të përbashkët: impaktin e lartë shoqëror duke shfrytëzuar mënyra kreative të përdorimit të teknologjisë.

Vlerësimet u bënë nga një juri e përbërë prej ekspertësh të teknologjisë së informacionit nga mbarë trevat shqiptare drejtuar nga Anni Dasho Sharko dhe emra të shquar të industrisë në fjalë si Ilir Çapuni, Altin Petre, Visar Jasiqi, Erton Graceni, Gjergji Spaho, Elvis Bregu, Sokol Vladi, Endri Mataj, dhe Redi Neziri.

Shtëpia Botuese ICTSmedia shpreh falenderimin e madh ndaj të gjithë mbështetësve, partnerëve, sponsorëve tradicional Fondacioni Dritan Hoxha, Banka Raifeissen, Albsoft, Universiteti New York i Tiranës, Digitalb, Top Channel, Ami Event, Microsoft, GIZ, Abissnet, jurisë me gjykimin e saj profesional, kontributorëve dhe të gjithë aplikantëve që kontribuan në realizimin e një tjetër edicioni edhe më të suksesshëm të Albanian ICT Awards. (ICTSmedia)

Lista e Fituesve:

Albanian ICT Awards – ICT Innovation of the Year – Rron Cena – Projekti Formom (Printeri 3D)
Albanian ICT Awards – ICT Academic of the Year – Blerim Rexha
Albanian ICT Awards – ICT Researcher of the Year – Shkëlzen Cakaj
Albanian ICT Awards – ICT Mobility of the Year – Genti Selenica
Albanian ICT Awards – ICT Diploma Thesis of the Year – Evio Abazi
Albanian ICT Awards – ICT Rising Star of the Year – Bleart Kepuska
Albanian ICT Awards – ICT Public Service of the Year in Kosova – Muhedin Nushi
Albanian ICT Awards – ICT Public Service of the Year in Albania – Mirlinda Karçanaj – Projekti e-albania
Albanian ICT Awards – Female in ICT of the Year – Erisa Terolli

Mirënjohje u ndanë për: Leutrim Berisha, Orven Bregu, Florian Kuhushevci.

 

/Business Mag Albania

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #28 - Prill 2022

Si sipërmarrës e keni dëgjuar, madje e keni predikuar shprehjen: jeta nuk bëhet më e lehtë, thjesht ju bëheni më të fortë. Kësaj radhe po e përjetojmë siç nuk e kishim imagjinuar.

Ndërsa po synonim të dilnim nga kthetrat e pandemisë, një tjetër plagë goditi Europën. Sulmi rus ndaj Ukrainës, i pakonceptueshëm nga bota moderne, erdhi si një Tsunami në Europë dhe madje në të gjithë Botën. Lufta me armë shkatërruese, deri tek kërcënimi i përdorimit të armëve nukleare, po sjell një dëm të jashtëzakonshëm për Ukrainën dhe popullin e saj. Mijëra të vrarë dhe mbi 4 milionë të shpërngulur nga vendi, pavarësisht rezistencës së fortë dhe të paparashikuar të ukrain- asve.

Zhvillimet dinamike në më pak se një muaj, çuan në vendime të pamenduara më parë për dhjetëra kompani ndërkombëtare. Tregjet e lëndëve të para panë çmime të rritura me ritmet më të larta të 40 viteve të fundit, ndërsa sheshet në kryeqytetet botërore, përfshirë Tiranën, pritën protestat, fillimisht kundër luftës e më tej kundër rritjes së çmimeve. Më 8 Mars, Çmimi i Naftës kaloi nga 199 lekë/litër në 260-270 lekë për litër, ndërsa po gjatë marsit, çmimi i bukës masive kaloi nga 80 lekë në 100 dhë së fundi 120 lekë. Qeveria ngriti komitete për të …

Shiko më shumë
Na ndiqni në rrjetet sociale
0