Në Sallën e Koncerteve “Tonin Harapi” në Tiranë, 10 ekipe startup-esh studentore, të cilat kanë qenë pjesë e programit të parë pilot Tirana Inc., prezantuan idetë e tyre të biznesit në DEMO DAY, përpara Ambasadorëve të BE-së dhe të Shteteve Anëtare, Ministres së Shtetit për Mrojtjen e Sipërmarrjes, Kryetarit të Bashkisë së Tiranës, përfaqësuesve të universiteteve dhe sektorit privat, aktorëve të ekosistemit të inovacionit, miqve dhe familjarëve.
Tirana Inc. është një nismë e pesë universiteteve shqiptare (Universiteti Politeknik i Tiranës, Universiteti Metropolitan, Universiteti Polis, Universiteti Epoka, Fakulteti i Ekonomisë në Universitetin e Tiranës), në partneritet me Qytetin e Tiranës, krijuar me mbështetjen e projektit ‘EU for Innovation’ i financuar nga BE-ja, qeveria gjermane dhe suedeze, me synimin për të nxitur krijimin e startup-eve dhe zhvillimin e ekosistemit të inovacionit në Shqipëri.
Tirana Inc., para së gjithash i shërben mbështetjes dhe fuqizimit të sipërmarrësve të rinj në Shqipëri, jo vetëm të studentëve/ kërkuesve/ novatorëve dhe ndihmon sipërmarrësit e rinj ambicioz, për të themeluar kompanitë e tyre, përmes pjesëmarrjes në programin e inkubimit të ideve.
I strukturuar rreth përvojave të sipërmarrësve të suksesshëm dhe i mbështetur nga ekspertë të startup eve, në pitching (presantim ideje), modelimin financiar dhe zhvillimin e produktit, Tirana Inc. është një program unik. Një komunitet është ndërtuar rreth saj: mbi 25 mentorë, 15 partnerë dhe 4 kompani sponsorizuese nga sektori privat. Kjo ofron një eksperiencë të rrallë dhe akses në një rrjet të gjerë, për sipërmarrësit e rinj.
DEMO DAY shënoi edhe “diplomimin” e ekipeve të startup-eve studentore, nga programi 12 javor i inkubimit. Një pjesë e rëndësishme e njohurive që sipërmarrësit e rinj fituan gjatë programit është dhe aftësia për të komunikuar në mënyrë efektive idenë e tyre të biznesit tek investitorët potencialë dhe palët e tjera të interesuara.
Ambasadori i BE-së, Luigi Soreca, i pranishëm në aktivitet u shpreh: “Përpjekjet e përbashkëta të shteteve anëtare nën ombrellën e projektit, me multi-donatorë ‘EU for Innovation’, kanë ndihmuar shumë në krijimin e Tirana Inc. Një projekt i cili është në interesin e të rinjve shqiptarë, sidomos nën kornizën e mundësive nga Tirana Kryeqyteti Rinor Evropian 2022 për të ndarë vizione, për të shfaqur talente, për të takuar njerëz të rinj dhe për t’u angazhuar.”
Duke folur si një nga anëtarët e ‘Skuadrës Evropa’, Ambasadori i Gjermanisë, Peter Zingraf pohoi se Tirana Inc. është një shembull i shkëlqyer i progresit të madh që është arritur në ekosistemin e inovacionit dhe startup-eve që nga viti 2018, me mbështetjen në zhvillimin e kapaciteteve të ofruar nga GIZ në Shqipëri, si zbatues i projektit ‘EU for Innovation’.
Ambasadorja e Suedisë Elsa Håstad u fokusua në përfaqësimin e madh të themelueseve vajza, midis 10 bizneseve të Tirana Inc. dhe bëri thirrje për më shumë sipërmarrëse gra, më shumë gra në teknologji dhe në STEM (shkencë, teknologji, inxhinieri dhe matematikë), për të patur një rritje ekonomike gjithëpërfshirëse në Shqipëri.
Së fundmi, Ambasadori i Holandës Reinout Vos shtoi se Tirana Inc. shënon një shembull tjetër të suksesshmëm të transferimit të njohurive nga një qasje evropiane, në bashkëpunim me partnerë të shkëlqyer vendas, nën ombrellën e Delegacionit Evropian në Shqipëri dhe inkurajoi qëndrueshmërinë e programit në të ardhmen.
Kryetari i Bashkisë së Tiranës, Erion Veliaj e përmbylli fjalën e tij me mundësitë e aktivitetet, që do të krijohen për të rinjtë në vitin 2022 nën Tirana, Kryeqyteti Evropian i Rinisë.
Ndërsa Ministrja e Shtetit për Mbrojtjen e Sipërmarrjes, Edona Bilali iu referua edhe një herë angazhimit të qeverisë shqiptare në mbështetjen e ekosistemit të startup-eve dhe inovacionit.
Nga 10 startup-et studentore (City Med, Click Home, Diabetic Digital Albanian App, Artsopolis Academy & Dada, Rentnow, ThreeSixty, Bite in Bytes, MeFol, Healthy Mind, Utopia Tiny House dhe I-Move Taxi) të cilat prezantuan, juria e ekspertëve shpërbleu me çmime monetare, përkatësisht 2500 Euro, të sponsorizuara nga Albtelecom, 1500 Euro, mundësuar nga Credins Bank dhe 1000 Euro nga Tirana Business Park, tre startup-et më të mira: RentNow, Bite in Bytes dhe Clickhome.
Çmime të tjera, të cilat ofronin mentorim dhe konsulencë, hapësira pune, bileta për konferenca ndërkombëtare dhe mjete teknike, iu dhuruan startup-eve studentore nga partnerët e Tirana Inc. dhe aktorë të ekosistemit si Coolab, INNVEST, Business Magazine, Cloud 68, PwC Albania & Kosovo etj.
DEMO DAY ishte një finale e suksesshme e programit pilot Tirana Inc., i mundësuar nga ‘EU for Innovation’ dhe i zbatuar nga GIZ me mbështetjen e Preneurz.Amsterdam.
Inkubatori i parë, multi-universitar, do të vazhdojë mbështetjen e ekipeve ambicioze, studentore, me ide të shkëlqyera biznesi, në vitet në vijim duke synuar të bëhet destinacioni numër një në Shqipëri, për sipërmarrësit e rinj, që synojnë të ndërtojnë biznesin e tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
