Shtyhet rritja e çmimit të energjisë

Konsumatorët familjarë nuk do të përballen me fashën 800 kWh duke nisur nga 1 Tetori, ndryshe nga sa  ubë e ditur këtë muaj nga qeveria. Vendimi vjen një ditë para masës së parashikuar.

Kryeministri Edi Rama, tha gjatë komunikimit të tij publik, se afati do të shtyhet, nisur nga përmirësimi situatës energjetike në vend.

Ai theksoi se, “siç e kemi njoftuar, nga 1 Tetori, pra nga nesër, është planifikuar hyrja në fuqi e fashës së konsumit 800 kWh mbi çmimin e mbrojtur nga qeveria për konsumatorët familjarë. Kjo fashë synon, nga njëra anë mbrojtjen në vazhdimësi të 96% të familjeve, të cilat edhe gjatë dimrit nuk e kalojnë kufirin e 800 kWh. Nga ana tjetër, fasha synon që 4% e abonentëve, të cilët e tejkalojnë këtë kufi dhe konsumojnë afro 20% të të gjithë sasisë së energjisë, të paguajnë me çmimin real çdo kë mbi kufirin e 800 Kw”.

Sipas tij, kërkesa për eneergji ka rënë duke theksuar ndryshimin e kushteve të motit, por edhe reagimin qytetar pas njoftimit për rritje. “Në 1 Shtator, kur vendosëm fashën me çmim të mbrojtur deri 800 kw, kërkesa për energji nga KESH ishte rreth 17, 000 Kwh, sot është rreth 11, 000 Kwh. Pa diskutim, në këtë ulje të ndjeshme ka luajtur rol rënia e temperaturave të nxehta, por s’ka dyshim se rol të rëndësishëm ka edhe fillimi i dukshëm i një qasje pozitive të abonentëve familjarë për ta kursyer energjinë”.

Kryeministri theksoi gjithashtu se, kemi pasur përmirësim të nivelit në Fierzë dhe presim që të materializohen dhe parashikimet për reshje të tjera në fund të dhjetë ditëshit të parë të tetorit.

“Ndaj, bazuar në një analizë më të detajuar të të gjithë parametrave teknikë dhe të projeksioneve, si dhe me angazhimin e plotë për të shfrytëzuar çdo mundësi dhe hapësirë që krijohet që ta lehtësojmë sadopak barrën faktike, por dhe atë psikologjike të kësaj situate ne vendosëm që aplikimi i fashës 800 Kw të mos hyjë në fuqi në muajin tetor”, tha Rama në fjalën e tij.