OSHEE investim 1 miliard lekë në Tiranë
Përditësuar së fundmi: 07/05/2019

OSHEE, investim 1 miliard lekë në Tiranë

Share
nga Ornela Trupja
Maj 07, 2019

Operatori i Shpërndarjes së Energjisë Elektrike, ka nisur një investim prej 1 miliard lekësh për një furnizim më të mirë me energji elektrike të Tiranës edhe të fshatrave përreth. Investimi përfshin rikonstruksionin e rreth 400 kabinave si dhe shtrimin e 10 fiderave të rinj nga nënstacioni Selitë. Investimet prekin tensionin e mesëm dhe atë të ulët dhe pritet të përfundojnë para sezonit të dimrit të 2019-ës.  Qëllimi i këtij investimi është jo vetëm rritja e cilësisë së furnizimit me energji elektrike, por edhe ulja e humbjeve në rrjet.

Ministrja e Infrastrukturës dhe Energjisë, Belinda Balluku, së bashku me administratorin e Operatorit të Energjisë Elektrike, Adrian Çela, kanë inspektuar punimet që po kryhen për këtë projekt në zonën e “Komunës së Parisit” në kryeqytet. Drejtori i OSHEE-së Tiranë, Klevis Jahaj, bëri të ditur se ndërhyrjet do të bëhen në kabinat, të cilat janë ndërtuar kryesisht gjatë viteve ’90-të. Sipas tij, kjo ndërhyrje është e nevojshme pasi prej vitesh nuk është bërë asnjë investim në to. Sipas Jahaj, në saj të 10 fiderave të rinj që do të shtrihen në dy nënstacionet, do të bëhet e mundur normalizimi i mbingarkesës.

Investimi me vlerë 1.1 miliard lekë, përfshin rreth 250 mijë abonentë të OSHEE-së, të cilët do të përfitojnë në përmirësimin e cilësisë së furnizimit me energji elektrike dhe në uljen e humbjeve. Nga ana e saj, ministrja Balluku u shpreh se investimet që po kryhen në rrjetin e Tiranës janë investime që ndikojnë direkt në performancën e OSHEE-së dhe në gjithë sektorin energjetik dhe se përmes tyre është bërë e mundur ulja e ndjeshme e humbjeve të energjisë në rrjet.

Lexo:  Panelet diellore, prodhuesit kërkojnë që tepricat t’i blejë OSHEE

Kërkesa për energji në Tiranë arrijnë në 37 % të kërkesës kombëtare. Sipas OSHEE humbjet në Tiranë kanë zbritur nga 35% në vitin 2014, në 16.8%.

Përmes rikonstruksionit të kabinave synohet vendosja e pajisjeve bashkëkohore, duke zëvendësuar teknologjinë e vjetër. ¼ e kabinave të reja do të përshtaten me teknologjinë RMU. Këto kategori kabinash, rrisin sigurinë dhe shpejtësinë e manovrimeve në rast defektesh ose mbingarkese në rrjet. Brenda muajit qershor investimet do të nisin edhe në zonat rurale të Tiranës.