Kozeta Liçaj, stilistja nga Vlora që ndërthur modernen me tradicionalen
Përditësuar së fundmi: 16/10/2019

Kozeta Liçaj, stilistja nga Vlora që ndërthur modernen me tradicionalen

Share
nga Ornela Trupja
Tet 16, 2019

Çdo ditë e më shumë po kthehemi tek tradicionalja. Punime me dorë, veshje tradicionale me elemente të modernes… Kozeta Liço është një nga këta gra, që ka hyrë në tregun shqiptar me një biznes të formatit të tillë.

Riprodhim i kostumeve autentike shqiptare dhe riprodhim i veshjes moderne të ndërthurura me atë tradicionale. Kështu e quan ajo biznesin e saj, i cili gjendet në qytetin e Vlorës. Në atelien e saj, Kozeta prodhon një sërë punimesh për mosha të ndryshme dhe për të dyja gjinitë. Në këto veshje ajo mundohet të shpalosë vlerat e kulturës së vendit tonë.

Lexo: 60 vjeçarja nga Berati i pëkushtohet biznesit

Në një kostum që vishte një nuse para shumë kohësh ajo fut elementë të modernes. Kjo është dhe risia që ajo mendon se ka sjellë përmes këtyre veshjeve. Biznesin e saj të veshjeve popullore ajo e ka ngritur me vetëfinancim. Për BusinessMag.al Kozeta thotë se ideja për nisjen e një biznesi të tillë, erdhi nga kërkesa që kishin grupet artistike për të tilla kostume. “Duke qenë se Vlora është një qytet që grumbullon turistë nga të katër anët e vendit dhe nga jashtë, gjithmonë kanë shfaqur interes për kulturën e vendit dhe zonave të ndryshme të Shqipërisë  dhe i thashë vetes që ndoshta është koha ta provoj këtë lloj biznesi”, thotë ajo.

Natyra e saj kreative dhe kërkuese gjithmonë është në kërkim të gjërave të reja dhe të bukura. 52 vjeçarja është gjithmonë në kërkim të sfidave të reja. Në këtë rrugëtim si sipërmarrëse ajo ka hasur edhe shumë probleme si për shembull vështirësia për t’u mbushur mendjen të tjerëve lidhur me vlerat e produktit të saj. Por, përpos kësaj, vështirësinë më të madhe e ka hasur në gjetjen e një stafi profesionist. Sipas saj për të prodhuar një kostum të tillë, duhet të jesh punëtor i kualifikuar.

Me shumë krenari na tregon se kostumet e saj i kanë veshur njerëz nga vende të ndryshme. E në fakt ky është edhe synimi i saj, të zgjerohet në Shqipëri, në rajon dhe më tej. Por për të bërë realitet këto plane Kozeta ka nevojë për ura lidhëse dhe bashkëpunime. Në këto tre vite ajo thotë se ka pasur rezultate të kënaqshme dhe se biznesi i saj po rritet.

Lexo: Anxhela Ferro, shqiptarja që do të dizenjojë mjetet e transportit në Francë

“Nëse i vendos një qëllim vetes, e çoj deri në fund, nuk lodhem. Jam natyrë energjike dhe besoj shumë në punën time. Jam shumë e sigurt që do të arrij aty ku synoj, duke punuar fort dhe duke kënaqur dëshirat e klientit tim”, thotë Kozeta për BusinessMag.al