Ja çfarë kërkon konfindustria nga qeveria e dalë nga zgjedhjet e 25 prillit

Konfindustria, me rastin e krijimit të qeverisë së dalë nga zgjedhjet e 25 prillit, kërkon nga Kryeministri Z. Edi Rama, se njëkohësisht gjetjes së emrave të titullarëve të rinj, të kryejë ndryshime thelbësore në pëgjegjësitë e portofoleve kryesore ministrore, që lidhen me zhvillimin e qëndrueshëm të  vendit.

Konfindustria, duke vlerësuar rezultatet e deritanishme të punës së ministrive, problematikave të shfaqura, gjendjen e vështirë ekonomike, proceset e integrimeve rajonale dhe BE, borxhin e lartë publik, përvojat e vendeve të zhvilluara dhe sfidat e hapura të përballjes me fatkeqësitë natyrore dhe shëndetësore, kërkon marrjen parasysh të ndryshimeve të mëposhtme:

• Krijimin e Ministrisë së Ekonomisë dhe Tregëtisë, duke e ndarë nga Ministria e Financave. Bashkimi mekanik i deritashëm i dy pjesëve, në thelb krijon konflikt të pastër institucional. Sa më sipër, ka patur pasoja të rënda për industritë dhe prodhimin vendas në favor të qartë të grupeve importuese, mungesës së politikave ekonomike dhe tregtare të domosdoshme në kushtet e proceseve integruese të tregjeve në shkallë kombëtare me Kosovën, Rajonale, BE dhe më gjerë.
• Krijimin e Ministrisë së Mjedisit, që duhet të mbulojë vetëm politikat mjedisore të ndara nga pjesa e Turizmit. Në rastin e sotëm të Ministrisë së  Turizmit dhe Mjedisit, jemi në kushtet e një përplasje të pastër institucionale. Një pjesë e madhe e problematikave të sotme mjedisore, korrupsionit dhe dështimeve në menaxhimin e burimeve turistike të vendit, me pasojë deri në ngjarje tragjike, vjen nga ndërtimi në konflikt institucional i dikasterit dhe agjencive vartëse. Turizmi mund të kalojë si pjesë e Ministrisë së Ekonomisë.

Lexo: Zinxhirët e furnizimit janë të bllokuara. Pra, si ndodh që tregtia po lulëzon?

• Krijimin e Ministrisë së Shërbimeve Publike dhe sa më sipër bëhet domosdoshmëri nga gjendja e sotme jashtë cdo standardi të  lejueshëm në mbulimin e nevojave të qytetarëve për ujin e pijshëm, të problematikave mjaft të rënda të trajtimit të derdhjeve të ujërave të zeza, industriale, mbetjeve të ngurta, etj. Sa më sipër ka pasoja të rënda në afatgjatë edhe në industrinë turistike.
• Ministria e Bujqësisë të lehtësohet nga pjesa e sigurisë në gjendjen e sotme, pjesa e sigurisë ushqimore si pjesë e Ministrisë së Bujqësisë përbën konflikt të hapur interesi institucional me pasoja të rënda për shëndetin e qytetarëve dhe konkurencën e ndershme në treg. Pjesa e sigurisë ushqimore për mprehtësinë e problematikave mund të jetë Agjenci Kombëtare në varësi të  drejtpërdrejtë të Kryeministrit ose pjesë e Ministrisë së Shëndetësisë, sipas shembujve të vendeve të BE.
• Ministri të ashtuquajtura “pa Portofol” këshillohet të “Përvoja e deritashme ka treguar, se janë në rol parazitar dhe të pakuptimtë.”