Innovation Nest – A jeni gati ta çoni startup-in tuaj në nivelin tjetër?!

Janë të shumtë të rinjtë që mendojnë se kanë një ide gjeniale biznesi, por nuk arrijnë dot të gjejnë financimin e nevojshëm për ta implementuar atë ide. Epo, kemi një lajm të mirë për të gjithë ju! Në treg ka gjithashtu investitorë të suksesshëm që janë në kërkim të ideve gjeniale të biznesit. Në 24 Tetor ata do të mblidhen te arTurbina për të kërkuar idenë e radhës që do të ketë potencialin për t’u kthyer në një biznes milionësh.

Innovation NEST (INN) – Foleja e Inovacionit, një projekt i TOK Digital Agency ka si synimin kryesor të bëjë bashkë investitorët me startup-et.

“Ne synojmë të gjejmë të rinjtë me idetë e biznesit më interesante në treg,” shprehet Erind Aliçkolli, një nga drejtuesit e INN, “dhe më pas i shoqërojmë këta sipërmarrës të rinj përmes një procesi të gjatë inkubimi”. Përmes moduleve të ndryshme të trajnimit të rinjtë mësojnë ta zhvillojnë edhe më tej idenë e tyre, të kuptojnë e menaxhojnë aspekte të tilla si marketingu, tregu global, menaxhimi financiar, etj, derisa ideja apo biznesi i tyre të jetë konsoliduar mjaftueshëm sa për të tërhequr vëmendjen e investitorëve.

“Në anën tjetër të INN qëndrojnë Engjëjt e Biznesit,” vazhdon Erindi, “një grup investitorësh entuziastë të teknologjisë që janë të bindur se inovacioni mund të ndryshojë thelbësisht sektorë të tillë si Turizmi, Energjia, AgroIndustria, MedTech, bioteknologjia, mjedisi dhe shëndeti, industritë krijuese, etj. Ne synojmë që startup-et t’i shtyjmë drejt zhvillimit të idesë së tyre në drejtime që do të tërhiqnin më shumë vëmendjen e investitorëve.”

Lexoni edhe: Innovation Nest Festival, vjen në Tetor në Tiranë

Nest ka arritur të bëjë bashkë një rrjet të gjerë investitorësh, i cili po zgjerohet vazhdimisht duke u shtrirë edhe në vendet e tjera të Ballkanit. Ata organizojnë shpesh evente ku synojnë të prezantojnë startup-et me investitorët, por megjithatë një nga mundësitë kyçe për të gjetur financim për idenë tuaj apo për të gjetur ide për të financuar është padyshim Innovation Fest. Pas suksesit të jashtëzakonshëm të edicionit të shkuar, këtë vit INN Fest parashikon të ketë mbi 500 pjesëmarrës nga 14 vende të ndryshme të Europës. Sipërmarrës, investitorë, shpikës, politik-bërës, kompani të mëdha ndërkombëtare, entuziastë të teknologjisë – të gjithë do të jenë në arTurbina në datat 24-25 Tetor në një mega-event që do ta shndërrojë Tiranën në kryqendrën ballkanike të teknologjisë.