Vite të tëra përvoje në biznes, televizion, shitje dhe marketing e mirëqenie u shpalosën në eventin 2 ditor “I love my Business”, organizuar nga Ermal Mamaqi. Teksa lexon titullin e eventit mendja të çon në taktika se si ta bësh biznesin tënd të suksesshëm. Por, trajnimit shkon përtej biznesit, sepse ashtu siç të gjithë pjesëmarësit në sallë zbuluan, biznesi i parë i yti, je ti!
Në datat 28 & 29 prill, mbi 2000 pjesëmarrës, të etur për të mësuar më shumë mbi rritjen personale dhe profesionale, trokitën në dyert e Pallatit të Kongreseve në orën 12:00 në ditën e parë të tij dhe vijuan rrugëtimin deri në orën 19:00 të ditës pasardhëse.
Trajnimi u fokusua në përmirësimin e vizionit, qartësisë dhe teknikat, që secili nga ne mund të përdorë për të qenë më i motivuar, më i frymëzuar dhe më efikas në jetë, marrëdhënie, punë dhe jo vetëm.
Vlerë e shtuar në event ishin dhe të ftuarit specialë nga bota e biznesit, artit dhe spiritualitetit.
Sipërmarrësi Samir Mane ndau mësime dhe pikëpamje nga eksperienca e tij që nga fillimet si sipërmarrës deri në ditët e sotme.
Kadri Morina po ashtu tregoi për audiencën pak nga historia e tij dhe sekretet për suksesin në biznes dhe jetë.
Ermir Mamaqi i dha fokus të veçantë departamentit dhe konceptit të shitjes, mënyrave dhe teknikave të zgjuara për të realizuar një shitje sa më efikase.
Mjeshtri i Meditimit Sheki Useini preku zemrat e çdo pjesëmarrësi me meditimin e tij dhe shpjegoi për të gjithë sa esencial është meditimi dhe qetësia e brendshme për arritjen e suksesit në jetë dhe karrierë.
Artisti Olen Cesari ishte një tjetër i ftuar special në event i cili frymëzoi pjesëmarrësit me muzikën e tij dhe dhuroi një performancë unike për të gjithë.
Një shfaqje të paharrueshme dhuruan dhe kërcimtarët e vegjël të Quest Style Crew Albania, të cilët ndezën skenën në ditën e dytë të eventit.
Në krye të dy ditëve të eventit, secili nga pjesëtarët mori me vete një buqetë emocionesh, përjetimesh dhe mësime që prekin çdo sferë të jetës apo punës së tyre. Ata patën mundësi të lidheshin me njëri-tjetrin, të krijonin bashkëpunime të mundshme dhe miqësi të reja.
Komentet e marra pas eventit qenë të jashtëzakonshme. Shumë individë shprehen se kjo eksperiencë i ka bërë më të mirë, më të fokusuar, më të qartë për gjërat që duan të arrijnë në jetë dhe i ka motivuar për të marrë rezultate më të mira në punën që bëjnë apo biznesin që zotërojnë.
Mes morisë së përjetimeve dhe dëshmisë se misioni i ekipit po përmbushet dita ditës Ermal Mamaqi ka thënë me bindje se është i vendosur ta vazhdojë “I LOVE MY BUSINESS” si një kontribut i madh për shoqërinë shqiptare në formimin e kulturës së punës, shëndetit, marrëdhënieve dhe mbi të gjitha përmirësimin e raporteve me njeriun më të rëndësishëm që secili nga ne ka: VETVETEN.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
