Nga Andi Bica dhe Beti Kumi – Shqipëria është një vend i bekuar, jo vetëm prej bregdetit të veçantë, ditëve me diell apo historisë së ngjeshur dhe monumenteve të rralla, por edhe prej burimeve të pasura të ujërave termale. Ndryshe nga lumenjtë që burojnë nga malet në lindje dhe shkojnë drejt deteve në perëndim, burimet e llixhave kanë një vijëzim paralel nga veriu drejt jugut. Kemi burime të nxehta nga Fushë Kruja në Elbasan dhe ato të ngrohta ose të vakëta nga Dibra në Përmet dhe Leskovik.
Këtë njohuri e ruaj nga një dialog i para shumë viteve në ekranin e Telenorba Shqiptare, në një program të improvizuar në studio me ekspertët e njohur të kësaj fushe, Alfred Frashëri dhe akademikun Godar Beqiraj. Ata kishin vizituar pothuajse të gjitha burimet termale dhe e shihnin Shqipërinë si një model potencial të Zvicrës për administrimin turistik të kësaj pasurie, duke vlerësuar edhe përdorimin e ujërave termale për ngrohjen e hoteleve dhe banesave përreth, në vend të gazit, energjisë elektrike apo druve.
Ndalemi në Elbasan, në Tregan, disa kilometra larg Tiranës. Në më pak se një orë udhëtim me makinë ose autobus, vitet e fundit gjithnjë e më shumë njerëz po zgjedhin këtë destinacion, ku ofrohen kushte më të mira pritjeje dhe një raport i favorshëm çmim-kualitet në disa hotele të rinovuara. Një turist mund të përfitojë një paketë prej 25 deri në 30 euro që përfshin fjetjen, ushqimin tre herë në ditë dhe dy seanca banjash termale në mëngjes dhe pasdite.
Lexo edhe: Samiti i Diasporës, mes fjalëve të mëdha dhe nevojës për rezultate konkrete!
Këto klinika-hotele ofrojnë standarde të ngjashme me resortet e plazhit, me dhoma të rehatshme dhe akses me ashensor për çdo kat, duke u fokusuar te relaksi dhe shërimi natyror. Në sallat e vaskave janë të pranishëm mjekë 24 orë në shërbim. Në ambiente të tjera ofrohen masaoterapi nga profesionistë të kualifikuar me një çmim rreth 5 euro, përfshirë trajtimet me kupa tradicionale, terapinë e ftohjeve me llamba infra të kuqe dhe terapinë me baltë.
Sipërmarrësi pukian Todi Puka, trashëgimtar i një familjeje të ardhur para 200 vjetësh në Gjinar të malësive të Elbasanit, është një nga realizuesit e këtyre klinikave-hotelerive të dedikuara për trajtimin dhe shërimin me ujëra termale. Vetëm vitet e fundit ai, ashtu si disa kolegë të tij, ka arritur të krijojë një standard më të qëndrueshëm pritjeje dhe akomodimi për turistë nga Shqipëria, Kosova dhe Maqedonia e Veriut.
E takojmë në zyrën e tij-studio, ku si inxhinier po projekton në mendje përmirësime të mëtejshme për Resortin PUKA të rindërtuar. Me një buzëqeshje të qetë, ai na pyet çfarë do të shtonim ose hiqnim nga përvoja e qëndrimit në hotel-klinikën e tij.
Ne, si reporterë shëtitës të kulturës, i sugjerojmë rëndësinë e dekorimit të hapësirave të jashtme me vepra arti. Një qasje që na kujton disa llixha në Italinë e Veriut, si stacioni termal në Salsomaggiore Terme në Parma dhe qendra e njohur e San Pellegrino Terme në Bergamo, ku vizita në vilat-klinika është një lloj pelegrinazhi drejt rikthimit të shëndetit dhe mirëqenies.
Todi e vlerëson këtë ide dhe kthehet me kujtime nga fëmijëria, kur mban mend statuja valltaresh pranë qendrave termale dhe monumentin e Nënës me Fëmijë, të cilin dëshiron ta rikthejë në hapësirat e resortit të tij.
Së bashku me stafin e tij, ai po zhvillon edhe sauna, spa dhe dhoma relaksi me pishina dhe trajtime me avull për të gjitha moshat.
E përshëndetëm miqësisht, me shpresën se energjia e kësaj toke, e besimeve dhe e traditave të Bajramit, Nevruzit dhe Pashkëve, do të vazhdojë të japë fryte. Në sfond mbetet ajo që vendasit dikur e quanin energjia e tokës së Amës dhe Atit, në qytetin antik të Skampës në Ilirinë e lashtë. Lulet e Ditës së Verës na shoqëruan në udhëtimin tonë drejt një reflektimi më të thellë mbi vlerat e vetvetes dhe të vendit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
