Stanislas de Quercize, tashmë ish-CEO i Cartier jep dorëheqjen nga posti ekzekutiv për arsye personale, ka deklaruar Compagnie Financiere Richemont ditën e sotme, e cila zotëron dyqanet e luksit Cartier.
Compagnie Financiere Richemont zotëron kompanitë më të mëdhaja lider në fushën e të mirave të luksit, në kategoritë kryesore si orë, stoli dhe aksesorë të tjerë luksi. E bazuar në Zvicër, ajo e zhvillon aktivitetin e saj që nga viti 1988 dhe operon sot në mbi 30 shtete. Renditet e 374-a në rankimin e Forbes mes 2000 kompanive më të pasura në botë.
De Quercize ka mbajtur postin më të lartë në Cartier që prej vitit 2012 dhe ka qenë në rrugëtimin e Richemont-it që prej vitit 1990, duke shërbyer në pozicione të larta lidershipi për marka të ndryshme brenda kompanisë. Ai do të japë dorëheqjen gjithashtu edhe nga Komitetit i Manaxhimit të Grupit të Richemont por do të vazhdojë të qëndrojë një anëtar i grupit, duke marrë postin e Presidentit të Richemont në Francë. Dorëheqja e tij vjen pas thashethemeve se de Quercize vuan nga probleme shëndetsore.
Cyrille Vigneron, aktualisht Presidenti i LVMH në Japoni, do të jetë pasardhësi i De Quercize më 1 janar të 2016-ës. Para se të bashkohej me Grupin LVMH, Vigneron ka punuar së bashku me Richemont ndërmjet viteve 1988 dhe 2013, kryesisht me Cartier, për t’u bërë më pas Drejtori i Menaxhimit të Cartier për filialin e Japonisë, president i Richemont në Japoni dhe Drejtori i Manaxhimit për Cartier Europe.
Si CEO i Cartier, Vigneron do të bëhet pjesë e Komitetit të Manaxhimit të Grupit Richemont. Për këtë arsye do të shërbejë si kandidaturë për Bordin e Drejtorëve të Compagnie Financiere Richemont në shtator të 2016-ës.
“Stainlas de Quercize ka pasur një karrierë të mrekullueshme, duke punuar me Cartier, Montblanc dhe Alfred Dunhill para se të merrte pozicione ekzekutive të Van&Cleef dhe Cartier,” është shprehur në deklaratën e tij Johann Rupert, Presidenti i Richemont. “Ndjejmë shumë keqardhje që Stanislas vendosi të japë dorëheqjen, por duhet të respektojmë vendimin e tij.”
Deklarata e Richemont vjen në një kohë kur kompania shpalli raportin e saj të rezultateve të gjysmës së parë të vitit, ku shitjet janë rritur me 15% vit pas vitit deri në 5.82 miliardë euro (6.32 miliardë dollarë). Të ardhurat neto për periudhën u rritën me 22% që korrespondojnë me 1.1 miliardë euro (1.19 miliardë dollarë).
“Një rrite e fortë në shitjet e Maisons’ kompensoi rënien e përgjithshme të kërkesës, e cila vinte më së shumti nga rajoni i Paqësorit të Azisë. Shitjet e stolive u rritën me shifra të larta; ky produkt tashmë përbën një të tretën e shitjeve të Grupit,” thotë Rupert.
”Ndikimi që ka patur paqëndrueshmëria e normave të këmbimit valutor, veçanërisht në forcimin e frangës zviceriane, është absorbuar në mënyrë të menjëhershmë nëpërmjet ndryshimit të çmimeve të shitjes dhe kontrollit të kostove administrative. Fitimet operacionale të periudhës u rritën me 6%. Kjo rritje dhe ndryshimet në monedhë kanë kontribuuar në një rritje të të ardhurave neto prej 22%.”
Duke përfshirë Cartier, Richemont zotëron 19 marka të aksesorëve të luksit, pjesa më e madhe në kategorinë e orëve dhe të stolive. Ato përfshijnë: Van Cleef & Arpels, Montblanc, Vacheron Constantin dhe Piaget.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
