Në një vit ku shumëkush priste që dollari amerikan të mbetej dominues, realiteti po tregon një histori tjetër. Në 2026, një grup monedhash nga tregje të ndryshme, nga Amerika Latine te Europa dhe Azia, po fitojnë ndjeshëm terren ndaj dollarit, duke reflektuar ndryshime të thella në ekonominë globale.
Në krye të kësaj liste qëndron reali brazilian, i cili është rritur mbi 10% kundrejt dollarit. Ky forcim nuk është rastësi: normat e larta të interesit në Brazil krijojnë një diferencë të madhe me SHBA, duke tërhequr investitorët që kërkojnë kthime më të larta. Kur kjo kombinohet me të ardhurat nga eksportet e mallrave si nafta dhe soja, efekti bëhet edhe më i fortë.
Menjëherë pas tij vjen dollari australian, i cili ka përfituar nga rritja e normave të interesit nga banka qendrore australiane, një zhvillim që për herë të parë pas shumë vitesh e vendos Australinë në një pozicion më të favorshëm se SHBA për investitorët. Një histori e ngjashme vlen edhe për koronën norvegjeze, e cila mbështetet fuqishëm nga çmimet e larta të naftës dhe një qasje më agresive e politikës monetare.
Në këtë panoramë spikat edhe naira nigeriane, e cila ka fituar terren falë të ardhurave nga nafta dhe besimit më të madh të tregjeve në reformat valutore të vendit. Po ashtu, tenge kazake dhe peso kolumbiane ndjekin të njëjtën logjikë: ekonomi të lidhura ngushtë me energjinë dhe mallrat, që përfitojnë drejtpërdrejt nga rritja e çmimeve globale.
Lexo edhe:Teknologjia e dronëve evoluon çdo 3–6 muaj, ndërsa Evropa mbetet prapa me sistemet e blera
Një nga rastet më interesante mbetet forinti hungarez. Rritja e tij lidhet me ndryshimet politike në vend, ku humbja e Viktor Orbán dhe ardhja në pushtet e Péter Magyar ka rritur optimizmin për marrëdhënie më të mira me Bashkimin Europian dhe për zhbllokimin e fondeve të rëndësishme.
Ndërkohë, peso argjentinas po përfiton nga një program me International Monetary Fund dhe përpjekjet për stabilizim fiskal, ndërsa shekeli izraelit mbështetet nga themele të forta ekonomike dhe një bankë qendrore që nuk shqetësohet nga forcimi i monedhës.
Në fund të listës, por ende në rritje, janë peso meksikane dhe peso kolumbiane. Meksika përfiton nga investimet e huaja që po zhvendosen më afër SHBA-së (fenomeni “nearshoring”), ndërsa Kolumbia mbetet e lidhur fort me çmimet e naftës.
Ajo që i bashkon të gjitha këto monedha është një realitet i ri global: ndërkohë që Federal Reserve po tregohet më e kujdesshme, pjesa tjetër e botës po lëviz më shpejt, qoftë përmes normave më të larta interesi, përfitimeve nga energjia, apo ndryshimeve politike që rrisin besimin e investitorëve.
Dhe pikërisht këtu qëndron historia e 2026: dollari nuk po dobësohet vetëm për shkak të SHBA-së, por sepse pjesa tjetër e botës po bëhet më konkurruese.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
