Aktivizimi i të rinjve drejt sipërmarrjes, ky është qëllimi i EUIN dhe World Vision

Të dhënat zyrtare të INSTAT tregojnë se niveli i papunësisë tek të rinjtë e grupmoshës 15-29 vjeç është i lartë në Shqipëri dhe ky fenomen prek veçanërisht ata të rinj që jetojnë në zona të largëta ku niveli i papunësisë është edhe më i lartë.

Lexoni: “Nëse nuk është e VËSHTIRË DHE SFIDUESE atëhere ndoshta ti nuk po kërkon maksimumin!”

World Vision në bashkëpunim me Qendrën për Informim të Bashkimit Europian organizuan një forum për motivimin e të rinjve drejt sipërmarrjes sociale, punësimit dhe vetë-punësimit.

Juljan Papaproko i World Vision theksoi se objektivi i këtij eventi është të krijojë një platformë të qëndrueshme për të informuar të rinjtë me praktika, projekte dhe shembuj biznesi, por edhe anasjelltas, që këto praktika të njihen edhe me të rinjtë dhe nevojat e tyre për t’u zhvilluar nga pikëpamja e biznesit.

Sipërmarrës të rinj e të suksesshëm nga vende të ndryshme të Shqipërisë sollën eksperiencat e tyre. Ende në moshë të re ata arritën të kthejnë idetë e tyre krijuese në biznese konkrete fitimprurëse që mbështesin zhvillimin ekonomik dhe social të komunitetit ku ata punojnë si Mullixhiu dhe PITUPI.

Ata treguan se si përmes biznesit të tyre kanë arritur që jo vetëm të jenë të suksesshëm, por edhe të përmirësojnë cilësinë e jetës në komunitete të varfra duke krijuar biznese të tjera të vogla dhe duke hapur mundësi punësimi.

Në sesionin e dytë vëmendja u fokusua tek angazhimi i të rinjve në aktivitete dhe projekte që zhvillojnë aftësitë e tyre për t’iu përgjigjur kërkesave të tregut të punës, mundësitë e programeve të BE-së dhe donatorëve të tjerë.

Lexoni: Julia Goga-Cooke: Kalimi nga i punësuar në BOS I VETVETES është vërtet emocionues

Eni Muci, përfaqësuese e Agjencisë për sipërmarrje sociale informoi se studentët e akademisë do bëjnë dizajne dhe zejtarët do i prodhojnë e kështu do krijojnë një markë. Një bashkëpunim i tillë, sipas saj, i jep mundësi punësimi më shumë qytetarëve.

Përfaqësuesja e PNUD-t, Besa Fuga tha se programi i vetëpunësimit është një nga ato programe që i ka rezultatet e prekshme. “Ka mbi 1 mijë aplikime nga të rinj të moshave 18-30 vjeç. Ka pasur ide lidhur me teknologjinë, inovacionin, por edhe bujqësinë, pra në fusha të ndryshme”, shprehet Fuga.

burimi: ATA