Këto të dhëna janë publikuar nga organizata “We are social” në raportin e saj “Digital in 2016”, e cila merret me studimin e prirjeve shoqërore në teknologji dhe internet.
Afërsisht gjysma e popullsisë njerëzore ka akses në internet dhe organizata “ We are Social” ka llogaritur se 2.31 miliard njerëz përdorin median sociale.
Gjithashtu ka 1.97 miliard përdorues të mediave sociale nga celulari dhe 3.79 miliard përdorues të celularëve, respektivisht 27% dhe 51% të popullsisë botërore.
Zona e Azi-Paqësorit ka regjistruar shtimin më të madh të përdoruesve të internetit, afërsisht 200 milion njerëz. Gjatë muajve të vitit të kaluar, gjysëm million njerëz çdo ditë i janë shtuar përdorimit të internetit.
Për sa i përket përdorimit të internetit në raport me popullsinë, Islanda kryeson me 98% të popullsisë si përdorues të rregullt, Bermuda 97% dhe Norvegjia 96%.
Koreja e Veriut renditet e fundit për sa i përket përdorimit të internetit me vetëm 7000 njerëz që kanë akses në internet.
Brazilianët dhe Filipinasit shpenzojnë më shumë kohë se të tjerët, me një mesatare prej 5.2 orë në ditë. Brazilianët gjithashtu shpenzojnë më shumë kohë në internet përmes celularit rreth 3.9 orë në ditë.
Japonezët dhe Koreano Jugorët shpenzojnë më pak kohë në internet se të tjerët, respektivisht 2.9 dhe 3.1 orë.
Për sa i përket tregut të medias sociale, Facebook vazhdon të dominojë tregun me 1.5 miliard llogari aktive, ndërsa aplikacioni i saj WhatsApp është rritur me 50% vitin e kaluar.
Amerika e Veriut ka nivelin më të lartë të përdorimit të mediave sociale, përkatësisht 59% të popullsisë. Ndërsa shteti që përdor më shumë mediat sociale në raport me popullsinë, është Tajvani me 77% të popullsisë që ka përdorur Facebook 30 ditët e shkuara.
Raporti gjithashtu nënvizon 3 përfundime kryesore që kompanitë duhet të ndjekin në këtë botë të shpejtë dixhitale.
Së pari, kompanitë duhet të përshtaten me botën e celularëve sepse celularët po ndryshojnë gjithçka.
Së dyti, kompanitë duhet të studiojnë se si lidhja në internet mund të përmirësojë elementë të biznesit të tyre, jo thjesht reklamat.
Së fundi, mediat sociale bazohen tek bashkëbisedimi, kështu që kompanitë duhet të punojnë të ndërtojnë marka sociale dhe jo të ndërpresin njerëzit gjatë komunikimit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
