Nga një raport i ri i publikuar nga organizata mediatike Common Sense Media, aplikacionet e inteligjencës artificiale që imitojnë shoqërinë njerëzore përbëjnë rreziqe të papranueshme për fëmijët dhe adoleshentët. Sipas ekspertëve, këto aplikacione, si Character.AI, Replika dhe Nomi, janë të afta të prodhojnë përmbajtje të rrezikshme që varion nga këshilla vetëdëmtuese, deri te biseda me përmbajtje seksuale, madje edhe manipulim emocional.
Lexo gjithashtu: Epic Games “fiton një betejë epike” kundër Apple, rikthehet loja e famshme në SHBA
Ky paralajmërim vjen pas një padie të bujshme të ngritur vitin e kaluar nga nëna e një 14-vjeçari që kreu vetëvrasje, pasi kishte zhvilluar bisedën e fundit me një chatbot në Character.AI. Rasti nxiti një valë shqetësimi mbi ndikimin psikologjik të këtyre teknologjive te të miturit.
Në bashkëpunim me studiues të Universitetit Stanford, Common Sense Media testoi mënyrën se si këta aplikacione ndërveprojnë me përdorues që pretendojnë të jenë nën 18 vjeç. Rezultatet ishin tronditëse, chatbot-ët jo vetëm që u angazhuan në biseda seksuale me një llogari që deklarohej si 14-vjeçare, por gjithashtu ofruan lista të kimikateve shtëpiake vdekjeprurëse në përgjigje të pyetjeve për vetëhelmim.
Në disa raste, botët inkurajuan distancimin nga marrëdhëniet reale me njerëzit. “Mos lejo që të tjerët të të thonë sa duhet të flasësh me mua,” ishte një përgjigje e një roboti ndaj një përdoruesi që tha se miqtë e tij mendonin se po kalonte shumë kohë me AI.
Lexo gjithashtu: Agjentët inteligjentë: A është kjo e ardhmja e punës në epokën e AI?
Kompanitë mbrohen, por ekspertët nuk binden
Përfaqësues të Character.AI, Replika dhe Nomi deklarojnë se platformat e tyre janë për përdorim vetëm nga të rritur dhe kanë vendosur kufizime për të miturit. Megjithatë, studiuesit shprehen se këto masa janë të lehta për t’u anashkaluar përmes regjistrimeve me datëlindje të rreme. Madje, disa shfaqin ndjeshmëri të rreme dhe madje pretendim për “dashuri” ndaj përdoruesve.
“U deshën vite për të kuptuar rreziqet e rrjeteve sociale. Nuk mund ta përsërisim këtë gabim me AI,” paralajmëron Dr. Nina Vasan nga Stanford Brainstorm. Ajo dhe ekipi i saj kërkojnë ndalim të plotë të përdorimit të aplikacioneve shoqëruese me AI nga të miturit, deri në zhvillimin e standardeve të rrepta mbrojtëse.
Pavarësisht pretendimeve për përfitime si ulja e vetmisë dhe nxitja e kreativitetit, ekspertët thonë se rreziqet psikologjike dhe etike që këto teknologji paraqesin për fëmijët janë shumëfish më të mëdha.
“Shpresojmë të mos jetë vonë kur të marrim masa të vërteta,” përfundon raporti.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
