Është sezoni i festave, por a duhet të përfshijë lista e shpenzimeve për festa edhe shefin apo kolegët tuaj? Blerja e dhuratave për kolegët dhe drejtuesin mund të jetë e ndërlikuar. Me afrimin e festave të fundvitit mund të bëheni nervozë në vendimin se cili prej kolegëve tuaj duhet të marrë një dhuratë, sa do të shpenzoni, çfarë të blini ose nëse është rasti t’u bëni një dhuratë të gjithëve.
Në rastin ideal, dhuratat duhet të jenë një shfaqje vlerësimi apo për t’i treguar një kolegu se ju pëlqen me të vërtetë të punoni me të – shpjegon Burgette White, zëvendëspresidente e Burimeve Njerëzore të Adecco North America, shoqëri për zgjedhjen e personelit për CNBC Make It. “Nuk duhet të jetë një sipërmarrje e kushtueshme apo që të shkaktojë ankth” – thotë ajo. Por koha është gjithçka në dhënien e një dhurate në vendin e punës – shton White. Për shembull t’i shfaqeni drejtuesit me një dhuratë të shtrenjtë dhe luksoze përpara rishikimit vjetor të ecurisë mund të perceptohet si një tentativë korrupsioni dhe “ju nuk doni ta vini në pozitë shefin tuaj”, shton White.
Më poshtë janë tri rregulla që duhet të ndiqni në rastin kur doni t’u bëni dhurata bashkëpunëtorëve në punë – sipas drejtuesve të Burimeve Njerëzore.
Mos shpenzoni shumë
Whitë këshillon të mos shpenzoni më shumë se 30 dollarë për t’u bërë dhuratë drejtuesit apo kolegëve.
“Secili prej nesh ka një nivel mirëqenie financiare të ndryshme dhe duhet ta respektoni, veçanërisht në kohëra inflacioni dhe një recesioni të mundshëm” – shpjegon White. Sipas një raporti të shoqërisë së rekrutimit Robert Half, përgjegjësit e Burimeve Njerëzore u këshillojnë punonjësve të shpenzojnë rreth 20 dollarë për t’u bërë dhurata drejtuesve apo kolegëve.
Tregohuni të kujdesshëm
Edhe pse dhuratat duhet të jenë të përshtatshme për punën, duhet të jenë edhe personale, – thotë André Heinz, Chief People and Culture Officer në Celonis, shoqëri software.
“Të bësh dhurata është një mënyrë me të vërtetë efikase për të krijuar një ndjesi përkatësie, bashkimi dhe gëzimi, veçanërisht gjatë festave” – pohon ai. Me rastin e mbrëmjes së fundvitit me kolegët, Heinz la në pjatën e secilit një kartolinë të shkruar me dorë, me përgëzime specifike për punën e tyre dhe arsyet se pse i vlerësonte ata. Nëse një kartolinë me urime të sinqerta nuk është në stilin tuaj, merrni në konsideratë t’i dhuroni drejtuesit tuaj apo kolegëve produkte për furrë, kartë klienti në kafenë e tyre të preferuar etj. Shmangni dhuratat me ngjyrime të mundshme politike, seksuale ose fetare, shton Heinz.
I njëjti rregull vlen edhe për pijet alkoolike dhe dhurata të papërshtatshme, të cilët mund t’i kalojnë caqet e Burimeve Njerëzore dhe të jenë fyese për të tjerët.
Merrni shembull nga kolegët
Në fund të fundit, nuk duhet të ndiheni të detyruar t’i bëni dhuratë dikujt në vendin e punës – thotë White. Është një traditë në punë që disa e përqafojnë, por sigurisht nuk është detyrim. Nëse jeni të pavendosur apo punonjës të rinj, pyesni ndonjë koleg se çfarë kanë bërë të tjerët në vitet e mëparshme. Është e rëndësishme të theksohet se një numër gjithnjë e më i madh kompanish po e braktisin idenë e dhuratave personale, duke adoptuar traditën e “Babagjyshit të Krishtlindjeve Sekret”, që mund të kërkojë “më pak angazhim dhe të jetë më argëtuese”. Por ju mund ta anashkaloni fare rutinën e dhënies së dhuratave – thotë White. “Ju mund t’u shprehni mirënjohje kolegëve dhe të festoni festat pa dhurata”. CNBC
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
