Konfindustria: Euro po shënon nivelin më të ulët historik në këto 12 vite

Gjatë muajit gusht 2019 Euro ka arritur nivelin më të ulët historik të vlerës së saj kundrejt Lek-ut në 12 vitet e fundit. Kjo situatë ka krijuar një shqetësim për konfindustrinë, pasi në një afat kohor 3 vjecar Euro është zhvleftësuar me mbi 13% të vlerës së saj kundrejt Lek-ut.  

Gjatë gjithë kësaj kohe, megjithë kërkesat në vazhdimësi të bizneseve vendore të prekura rëndë, ndërhyrjet e Bankës së Shqipërisë në tregun valutor kanë qenë krejtësisht të paqarta dhe me ndikim tepër afatshkurtër. Sipas tyre zhvleftësimi i tejskashëm i Euro-s kundrejt Lek-ut, do të pasqyrojë pasoja të rënda dhe afatgjata për zhvillimin e ekonominë kombëtare, prodhimin dhe industritë vendore.

Ata theksojnë se mungesa e plotë e analizës institucionale së shkaqeve, pasojave në ekonomi, mosveprimet dhe politikat e gabuara të Bankës së Shqipërisë në problematikat e zhvleftësimit të thellë të Euro-s, në mjaft raste cënojnë pavarësinë e siguruar me ligj të institucionit. “Rasti i fillimit të politikës së “de-euroizimit” të ekonomisë, që përkoi pikërisht në kulmin e zhvleftësimit të monedhës europiane ndaj Lek-ut, është shembull i qartë i paaftësisë dhe deri subjektivizmit të Bankës së Shqipërisë”.

Lexo: Konfindustria: Afati i vendosur për sistemin e mbifaturimit është i pa mjaftueshëm

“Pasojat e mbivlerësimit të Lek-ut kundrejt monedhës europiane godasin drejtpërdrejt fuqinë konkuruese të vendit për investime prodhuese, ndihmojnë hapur lobet importuese në dëm të prodhimeve të markes “Made in Albania”. Prekin ndjeshëm deri në falimentim kompanitë shqiptare, që prodhojnë për eksport dhe tregun vendor, zhveftësojnë ashpër kursimet dhe mbijetesën e një mase dërrmuese të qytetarëve me burim të ardhurat nga emigracioni”.

Sipas tyre nëse Banka e Shqipërisë nuk është në gjendje të plotësojë detyrat e saj të përcaktuara në ligj, atëherë është koha për të riparë në themel gjithë legjislacionin në fuqi.