Aksionet e kompanive të udhëtimeve ranë ndjeshëm të hënën, pasi përshkallëzimi i konfliktit mes Shteteve të Bashkuara, Izraelit dhe Iranit solli ndërprerje të fluturimeve në mbarë botën, mbylljen e disa aeroporteve kyçe në Lindjen e Mesme dhe rritje të fortë të çmimeve të naftës.
Situata u përkeqësua pasi disa nga aeroportet më të rëndësishme në Lindjen e Mesme, si Dubai dhe Doha, u mbyllën për disa ditë radhazi. Dubai është aeroporti ndërkombëtar më i ngarkuar në botë, me mbi 90 milionë pasagjerë në vit. Mbyllja e tij ka lënë dhjetëra mijëra njerëz të bllokuar dhe ka krijuar kaos në shumë aeroporte të tjera.
Në bursë, kompanitë e mëdha të udhëtimeve pësuan rënie të fortë. Aksionet e TUI ranë me rreth 7%. Kompania që zotëron British Airways, International Airlines Group, humbi rreth 9% të vlerës. Edhe Lufthansa dhe Air France-KLM pësuan rënie të ngjashme. Në të njëjtën kohë, edhe kompani hoteliere si Accor dhe operatorë kroçerash si Carnival Corporation u goditën në treg.
Arsyeja kryesore është rritja e çmimit të naftës, e cila u rrit me rreth 7% brenda një dite. Kur nafta shtrenjtohet, rriten menjëherë kostot për linjat ajrore, sepse karburanti përbën një nga shpenzimet më të mëdha të tyre. Përveç kësaj, anulimet dhe devijimet e fluturimeve krijojnë shpenzime shtesë dhe humbje të ardhurash.
Lexo edhe: Konflikti në Lindjen e Mesme paralizon linjat ajrore, çfarë duhet të dini si udhëtar
Edhe kompanitë aziatike u prekën. Linja ajrore si Cathay Pacific anuloi të gjitha fluturimet drejt Lindjes së Mesme. Singapore Airlines pezulloi përkohësisht fluturimet drejt Dubait. Shumë kompani të tjera në Japoni, Kinë dhe Malajzi pësuan rënie në bursë.
Ndikimi nuk po ndjehet vetëm nga kompanitë, por edhe nga pasagjerët. Shumë udhëtarë janë detyruar të ndryshojnë itineraret në moment të fundit, ndërsa disa fluturime janë kthyer mbrapsht gjatë rrugës për shkak të mbylljes së hapësirës ajrore. Në disa aeroporte është raportuar konfuzion dhe mungesë informacioni.
Ekspertët paralajmërojnë se nëse tensionet vazhdojnë, situata mund të zgjasë për javë të tëra. Përveç problemeve të menjëhershme me fluturimet, pasiguria politike dhe rritja e çmimeve të energjisë mund të ndikojnë negativisht në dëshirën e njerëzve për të udhëtuar.
Pas një periudhe stabilizimi për industrinë e turizmit, kjo krizë e re po rikthen pasigurinë në një sektor që varet shumë nga stabiliteti global.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto