Ëndrrat lucide ndodhin kur një person është i vetëdijshëm se po ëndërron, ndërkohë që vazhdon të qëndrojë brenda gjendjes së ëndrrës. Ky fenomen shfaqet gjatë fazës REM të gjumit dhe ka potencial të madh përdorimi, nga zgjidhja e problemeve psikologjike dhe fiziologjike, deri te mësimi i aftësive të reja.
Studiuesit e REMspace, një startup neuro-teknologjik me bazë në Kaliforni, kanë bërë një zbulim të rëndësishëm: ëndrrat lucide mund të shërbejnë si një mënyrë e re komunikimi mes njerëzve. Përmes pajisjeve të specializuara, ata arritën të ndihmonin dy persona të hynin në gjendje ëndrre lucide dhe të shkëmbenin një mesazh të thjeshtë mes tyre.
Më herët, REMspace kishte provuar se sensorë të avancuar janë në gjendje të kapin tinguj specifikë të prodhuar gjatë ëndrrave. Kjo çoi në krijimin e Remmyo, një gjuhë e veçantë për ëndrra, e cila mund të identifikohet nga sensorë me ndjeshmëri të lartë.
Më 24 shtator, pjesëmarrësit në eksperiment fjetën në shtëpitë e tyre, ndërsa aktiviteti i trurit u monitorua përmes një pajisjeje të posaçme. Sapo pjesëmarrësi i parë hyri në një ëndërr lucide, sistemi i transmetoi atij një fjalë të rastësishme nga gjuha Remmyo përmes kufjeve. Ai e përsëriti fjalën brenda ëndrrës së tij dhe mesazhi u regjistrua nga sistemi.
Lexo edhe: Roboti që bën punët e shtëpisë për 500$ në muaj, inovacion apo fillimi i frikës?
Tetë minuta më vonë, pjesëmarrësja e dytë hyri gjithashtu në një ëndërr lucide. Ajo mori mesazhin e dërguar nga pjesëmarrësi i parë dhe e konfirmoi atë pasi u zgjua. Ky moment shënoi “bisedën” e parë në histori të shkëmbyer mes dy njerëzve gjatë ëndrrave. Përveç kësaj, dy persona të tjerë arritën të komunikonin drejtpërdrejt me sistemin gjatë ëndrrave të tyre. Ky sukses vjen pas gati pesë vitesh kërkimi intensiv dhe zhvillimi teknologjik. Që nga komunikimi i parë në ëndrra më 24 shtator, ekipi i REMspace ka vazhduar të përmirësojë teknologjinë dhe të arrijë rezultate gjithnjë e më të avancuara.
Michael Raduga, themelues dhe CEO i REMspace, u shpreh mbi këtë arritje: “Dje, komunikimi në ëndrra dukej si fantashkencë. Nesër, do të jetë aq i zakonshëm sa nuk do ta imagjinojmë jetën pa këtë teknologji.”
Ai shtoi se kjo risi hap rrugën për aplikime të shumta komerciale, duke ndryshuar rrënjësisht mënyrën se si e perceptojmë komunikimin dhe ndërveprimin në botën e ëndrrave. “Ne besojmë se gjumi REM dhe fenomenet e lidhura me të, si ëndrrat lucide, do të shndërrohen në industrinë e radhës madhore pas inteligjencës artificiale.”
Hapi i ardhshëm për REMspace është edhe më ambicioz: realizimi i komunikimit në kohë reale gjatë ëndrrave lucide. Edhe pse një objektiv shumë më kompleks, ekipi shpreson ta arrijë këtë brenda pak muajsh.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
