Fëmijët janë e ardhmja jonë. Edhe pse kujdesemi për ta tani, shumë prej tyre do të kujdesen për të tjerët në të ardhmen si në punë ashtu edhe në shtëpi. Është tepër e rëndësishme që t’u tregojmë fëmijëve rrugën e lidershipit, jo vetëm për hir të tyre, por edhe për hir të të tjerëve.
Lexoni: Një rast reflektimi: Edukimi i fëmijës në Japoni, e më tepër
Ne jemi model i fëmijëve tanë. Sjellja jonë dhe gjërat që bëjmë çdo ditë, qoftë të mëdha apo të vogla, mund të ndikojnë ndjeshëm tek fëmijët tanë dhe suksesin e tyre më vonë si liderë në jetë. Për të transformuar fëmijët sot në liderë më të mirë nesër, BusinessMag ju sjell në këtë artikull 5 gjëra që mund të bëni, të cilat do të japin rezultatet më të mira.
- Theksoni rëndësinë e këmbënguljes
Një lider i vërtetë di se si të përballojë dështimin gjatë udhëtimit të tij drejt suksesit. Mos mendoni se duhet t’i mbroni fëmijët nga zhgënjimi dhe humbja, në vend të kësaj, ekspozojini ata përballë vështirësive në mënyrë që të mund të mësojnë se si të ecin përpara ballë-lartë.
- Merrni parasysh kampet verore
Po, kampi veror ka për qëllim të jetë zbavitës, por shërben si një përvojë tepër e fuqishme e të mësuarit. Kampi veror është i mbushur me aktivitete në ekip dhe madje edhe me mundësi për fëmijët tuaj për të udhëhequr grupet e shokëve të tyre dhe të fëmijëve më të vegjël.
- “Jo”
Thoni jo. Lidershipi kërkon durim, duke vonuar kënaqësinë e menjëhershme dhe duke punuar shumë për atë që ka rëndësi. Fëmijëve duhet t’u thuhet jo dhe ata duhet të përjetojnë zhgënjime të përkohshme. Përndryshe, ju rrezikoni t’i dëmtoni ata dhe të kufizoni zhvillimin e tyre të lidershipit.
Lexoni: Kur fëmijët janë përgjegjës të burimeve njerëzore
- Mësojuni zgjidhjen e konflikteve
Çdo lider ballafaqohet me konfliktet, kështu që sigurohuni që lideri juaj i vogël të dijë se si t’i menaxhojë ato. Liderët e mëdhenj e dinë se si t’i përballojnë me mirësjellje konfliktet, nëpërmjet të kuptuarit, komunikimit efektiv dhe kompromisit. Kur fëmija juaj po grindet me një vëlla apo mik, përdorni këto grindje si një mundësi për t’i shfaqur dhe për t’i mësuar zgjidhje efektive të konflikteve.
- Inkurajoni ëndrrat e tyre
Ndërsa fëmija juaj i plotëson ditët me detyrat e shtëpisë dhe me punë shtëpie, është tepër e rëndësishme që t’i inkurajoni ata që të ndjekin interesat e tyre gjatë kohës së lirë. Fëmijët, të cilët janë të përkrahur ndërsa shkojnë pas pasioneve dhe ëndrrave të tyre, do të vendosen në rrugën drejt lidershipit, të fortë dhe optimistë. Ata do të kenë vetëbesimin për të udhëhequr të tjerët drejt progresit dhe suksesit.
Lexoni: 6 mënyra se si prindërit shkatërrojnë suksesin e fëmijës së tyre
Kur i rrisni fëmijët tuaj si liderë, ata do të formojnë marrëdhënie më të mira personale, do të performojnë më mirë në shkollë dhe do të ballafaqohen lehtësisht me vështirësitë aktuale dhe të ardhshme. E gjitha çfarë duhet të bëni është të jeni një lider efektiv për veten dhe fëmijën tuaj, duke ndriçuar rrugën për gjeneratat që do të vijnë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
