Dita e sotme, data 30 Prill 2019 përkon me aktivitetin përmbyllës të kësaj ngjarje, Mbrëmja Gala, pas një maratone 90 ditore në kërkim, identifikim dhe shpërblim të shpirtit novator, produktiv, sipërmarrës dhe teknologjik të shqiptarëve në Shqipëri, Kosovë, Maqedoni, Mali i Zi dhe diasporë.
Lexoni: Hapet edicioni i shtatë i ICT Awards, me panelin e përbërë nga fëmijë
Në këtë aktivitet do të nderojnë me pjesëmarrjen e tyre: Kryetari i Bashkisë Tiranë z. Erion Veliaj, Ministri i Inovacionit të Kosovës z. Besim Beqaj, Ministri i Zhvillimit Ekonomik të Kosovës z. Valdrin Luka, Ministri i Shtetit për Mbrojtjen e Sipërmarrjes së Shqipërisë z. Eduard Shalsi, Serkretarja e Përgjithshme e Këshillit të Bashkëpunimit Rajonal(RCC) zj. Majlinda Bregu, politikanë, diplomatë, akademikë, studiues, të rinj dhe të reja të botës së teknologjisë nga mbarë trevat shqipfolëse, të cilët me pjesëmarrjen e tyre po aq sa kandidatët e ICT Awards dëshmojnë karakterin mbarëkombëtar të kësaj gare.
I konsideruar gjerësisht si “Oscar” i teknologjisë në Shqipëri, Albanian ICT Awards vlerëson dhe shpërblen çdo vit profesionistë, udhëheqës biznesesh, inovatorë, akademikë dhe të rinj, të cilët kanë lënë gjurmë teknologjike shqiptare me punën e tyre të palodhur në komunitetet ku jetojnë.
Të gjithë ata që janë ngjitur në skenën e Albanian ICT Awards ndër vite janë model për të gjithë të rinjtë në Shqipëri, sepse ky brez shqiptar nuk ka asnjë dallim nga asnjë brez të rinjsh në çdo cep të botës dhe kjo falë teknologjisë.
Ku dhe kur?
- Qyteti: Tiranë
- Vendi: MAK Hotel Tirana
- Data: 30 Prill 2019
- Hapja: 18:00
- Mbyllja: 22:00
Albanian ICT Awards VII përfaqësohet nga 7 kategori vlerësimi: ICT Inovacioni i Vitit, ICT Mobiliteti i Vitit, ICT Diploma e Vitit, ICT Ylli në Ngritje, Gruaja ne ICT, ICT Shërbimi Publik i Vitit si dhe Siguri Kibernetike.
Përveç çmimeve shpërblyese për kategoritë e lartpërmendura si çdo edicionin Mbrëmja Gala rezervon jo vetëm mirënjohje për finalistët, por edhe çmime surprizë, të cilat do të zbulohen gjatë aktivitetit.
Edicioni i 7-të startoi më 6 Shkurt në Tiranë dhe do të përmbyllet më 30 Prill 2019 në Mbrëmjen Gala, e cila organizohet në MAK Hotel Tirana (Ish Sheraton Tirana Hotel). Janë organizuar më shumë se 25 takime në shkolla, universitete, qendra dhe hapësira inovacioni në kuadër të edicionit të 7-të në: Tiranë, Prishtinë, Shkup, Tetovë, Vlorë, Pejë, Prizren, Preshevë, Lezhë, Ferizaj dhe Mitrovicë.
Lexoni: ICT Awards në vitin e shtatë në kërkim të gjurmëve inovatore
Që nga edicioni i parë janë vlerësuar mbi 1,000 projekte në fusha të ndryshme të teknologjisë dhe vlerësuar e shpërblyer mëse 100 prej tyre. Në këtë edicioni pranë ICTAwards.org mbërritën 110 aplikime në 7 kategori. Ato janë vlerësuar nga një panel jurie e përbërë nga profile të ndryshme të shoqërisë, përfaqësues institucionesh publike, universitete, njerëz të shkencës, biznesit, ekspertë, brenda dhe jashtë kufijve kombëtarë.
Me partnerët strategjik si Fondacioni “Dritan Hoxha”, banka Raiffeisen në Shqipëri, të mediave si Top Channel, TV Klan, Business Magazine Albania dhe kompanive private si ALBVISION e shumë partnerëve dhe sponsorëve të tjerë, ICT Awards edhe këtë vit do të shpërblejë finalistët dhe fituesit me çmime të ndryshme.
Axhenda e aktivitetit:
- 18:00 – 19:30 Regjistrimi & Networking
- 19:45 – Hapja e Mbrëmjes Gala
- 20:00 – Ndarja e çmimit Ylli në Ngritje
- 20:30 – Ndarja e çmimit Diploma e Vitit
- 20:45 – Ndarja e çmimit Mobiliteti i Vitit
- 21:00 – Ndarja e çmimit Gruaja në ICT
- 21:15 – Ndarja e çmimit Inovacioni i Vitit
- 21:30 – Ndarja e një çmimi surprizë
- 21:45 – Ndarja e çmimit Shërbimi Publik i Vitit
- 22:00 – Ndarja e Çmimit Cyber Security
- 22:15 – Mbyllja / Closing, Cocktail
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
