Presidenti amerikan Donald Trump ka shprehur pakënaqësinë e tij ndaj planit të CEO-së së Apple, Tim Cook, për të prodhuar iPhone-ët e destinuar për tregun amerikan në fabrika të reja në Indi.
“Dje pata një problem të vogël me Tim Cook,” tha Trump të enjten nga Katari. “I thashë: ‘Tim, je miku im. Të kam trajtuar shumë mirë. Po sjell 500 miliardë dollarë këtu.’ Por tani dëgjoj që po ndërton fabrika nëpër Indi. Nuk dua të ndërtosh në Indi.” Trump ka vendosur tarifa historike mbi pothuajse të gjitha mallrat që importohen në SHBA, me qëllimin për të nxitur prodhimin vendas, për të përmirësuar bilancin tregtar dhe për të mbledhur të ardhura për të financuar shkurtimet e planifikuara të taksave. Edhe pse disa kompani, përfshirë Apple-in, kanë njoftuar plane për të shtuar prodhimin në SHBA për të shmangur tarifat e larta, ndërtimi i fabrikave kërkon vite dhe puna në Amerikë mbetet e shtrenjtë. Kompanitë nuk mund ta ndryshojnë menjëherë rrjedhën dhe të nisin prodhimin totalisht në SHBA.
Trump tha se Apple mund të ndërtojë fabrika në Indi “për të përmbushur nevojat e Indisë”, por shtoi se kompania “po rrit prodhimin në SHBA”. (Apple nuk ka komentuar menjëherë.) Komentet e tij vijnë pas vendimit të Apple për të zhvendosur prodhimin e iPhone-ve për tregun amerikan nga Kina në Indi, për të shmangur tarifat e shtuara. Kompania ka bërë të ditur se tarifat mund t’i kushtojnë asaj deri në 900 milionë dollarë vetëm këtë tremujor.
Lexo edhe:Europa e pabarabartë në paga, Gjermania në krye, ja vendet që paguajnë më pak
Gjatë një thirrjeje me analistët këtë muaj, Tim Cook tha se “shumica e iPhone-ve të shitur në SHBA do të kenë si vend origjine Indinë.” Apple ka vite që punon për të zhvendosur një pjesë të prodhimit në Indi, duke ndërtuar fabrika të reja dhe duke punësuar staf vendas. Kompania aktualisht nuk ka kapacitet për të prodhuar iPhone në SHBA dhe, për shkak të kompleksitetit të zinxhirit të furnizimit, me shumë gjasë nuk do të prodhojë së shpejti produktin e saj më të njohur në Amerikë.
Edhe pse administrata Trump është e etur të sjellë prodhimin e iPhone-ve në SHBA, analistët thonë se një gjë e tillë është thuajse e pamundur për shkak të kostove të larta. Sipas Dan Ives, drejtues global i kërkimeve për teknologjinë në Wedbush Securities, nëse iPhone-t do të prodhoheshin në SHBA, çmimi i tyre mund të trefishohej dhe të arrinte deri në 3,500 dollarë.
Apple kishte njoftuar më herët, në muajin shkurt, një plan investimi prej 500 miliardë dollarësh për zgjerimin e objekteve të saj në SHBA gjatë katër viteve të ardhshme, me synimin për të krijuar 20,000 vende pune. Ky investim ndërtohet mbi përpjekjet e mëparshme të Apple për të diversifikuar zinxhirin e furnizimit jashtë Kinës, pjesërisht si përgjigje ndaj problemeve të prodhimit gjatë pandemisë. Këto përpjekje përfshijnë edhe shtimin e prodhimit të kompjuterëve Mac Pro në Teksas.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
