Studiuesit e Stanford University kanë prezantuar SleepFM, një model të ri të inteligjencës artificiale që mund të parashikojë mbi 130 gjendje shëndetësore, përfshirë demencën, atakun në zemër dhe sëmundjen e Parkinsonit, duke u bazuar vetëm në të dhënat e një nate gjumi.
Modeli është trajnuar mbi rreth 600 mijë orë të dhëna klinike të gjumit, të mbledhura nga afërsisht 65 mijë pjesëmarrës. Ai analizon sinjale të ndryshme të trupit që regjistrohen gjatë studimeve të gjumit me polisomnografi, përfshirë valët e trurit, aktivitetin e zemrës, ritmin e frymëmarrjes dhe sinjalet muskulore.
SleepFM funksionon duke identifikuar raste kur këto sinjale biologjike nuk janë në harmoni mes tyre. Për shembull, nëse truri hyn në fazën e gjumit të thellë ndërkohë që zemra mbetet tepër aktive, sistemi e konsideron këtë si një sinjal paralajmërues të hershëm për rreziqe të mundshme shëndetësore.
Lexo edhe:A e dinit se ekzistojnë shtete pa kryeqytet? Dy raste unike që sfidojnë rregullin botëror
Për të testuar saktësinë e modelit, studiuesit lidhën të dhënat e gjumit me 25 vite të dhëna mjekësore nga Klinika e Gjumit e Stanford-it, duke vlerësuar aftësinë parashikuese të sistemit në më shumë se 1.000 kategori sëmundjesh.
Rezultatet e testimeve janë mbresëlënëse:
- Sëmundja e Parkinsonit u parashikua me 89% saktësi,
- Demenca me 85%,
- Ataku në zemër me 81%,
- ndërsa rreziku i përgjithshëm i vdekshmërisë me 84% saktësi.
Studiuesit theksojnë se SleepFM nuk është një mjet diagnostik, por një instrument parashikues që tregon se edhe vetëm një natë gjumi mund të zbulojë rreziqe afatgjata për shëndetin.
Me përmirësimin e vazhdueshëm të teknologjive të gjumit dhe pajisjeve “wearable”, modele të tilla mund të hapin rrugën që zbulimi i hershëm i rreziqeve shëndetësore të dalë përtej laboratorëve të specializuar dhe të bëhet pjesë e monitorimit të përditshëm të shëndetit.
Studimi i plotë është publikuar në revistën shkencore Nature Medicine dhe mund të lexohet këtu:
https://www.nature.com/articles/s41591-025-04133-4
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
