Sipërmarrjet shqiptare mund të përfitojnë nga përvoja e ekspertëve gjermanë - Business Magazine Albania

Sipërmarrjet shqiptare mund të përfitojnë nga përvoja e ekspertëve gjermanë


Ndërmarrjet e vogla dhe të mesme shqiptare, por edhe institucionet arsimore, administrata publike, sektori i shëndetësisë, por edhe organizatat jofitimprurëse mund të përfitojnë për nevojat e tyre nga përvoja gjermane e ekspertëve të cilët janë në pension apo në prag pensioni. Shoqata Gjermane e Industrisë dhe Tregtisë në Shqipëri (DIHA), si dhe përfaqësues të Shërbimit të Ekspertëve Senior (SES) prezantuan projektin e ekspertëve gjermanë.

Gjatë fjalës së saj, ambasadorja e Gjermanisë në Tiranë, Susanne Schutz, tha se ky projekt, deri tani, ka realizuar rreth 140 misione në Shqipëri dhe se duhet të shfrytëzohet nga aktorë të ndryshëm në fusha të tilla si artizanati, teknologjia, tregtia dhe shitjet, shëndetësia e punët sociale, por edhe shkenca dhe administrimi.

Ndërsa drejtori administrativ i DIHA-s, Hartmut Jaroch, tha se shërbimi që ofrojnë ekspertët gjermanë në pension ose në prag pensioni është këshillues si dhe në ofrimin e përvojave të tyre. Për përfaqësuesen e projektit SES-së, Anja Wesely, ekspertët gjermanë kanë një sërë avantazhesh, kanë përvojë të gjatë, janë fleksibël dhe të orientuar nga praktika dhe i kryejnë misionet e tyre në formë vullnetare dhe të pavarur.

Regjistri i ekspertëve numëron rreth 12,000 persona, të cilët janë të profilizuar dhe detyrat e tyre kryesore kanë të bëjnë me kualifikimin e specialistëve, zhvillimin e strategjive të marketingut, optimizimin e proceseve të punës, menaxhimin e cilësisë etj.

Përzgjedhja e tyre kalon nëpërmes një procesi, ku rëndësi i jepet aplikimit të saktë dhe të detajuar nga ana e kompanive apo përfaqësive shqiptare. Këta të fundit duhet të paraqesin detaje në lidhje me nevojat e tyre dhe sektorin ku ata duan të përqendrojnë asistencën e ekspertëve gjermanë. Kjo ekspertizë ofrohet falas, por pala shqiptare duhet të mbulojë të gjitha kostot lokale, që përfshijnë: dieta ditore, kosto udhëtimi, akomodimi, kosto të përpunimi të projektit, etj.

Eksperti mund të qëndrojë në Shqipëri për një periudhë nga 4-6 javë, por bashkëpunimi i tij me kompaninë shqiptare vazhdon edhe pas përfundimit të misionit, për të cilin jepen rekomandime të qarta me shkrim.

SES në Shqipëri është prezent që nga viti 2009, fillimisht me vetëm pak misione, por me kalimin e viteve numri i tyre u rrit. Për vitin 2016, janë realizuar deri në fund të tetorit 15 misione ekspertësh. Ndër më të suksesshmet mund të përmenden ato që janë ofruar në furra buke, në ferma, në fabrika të nënprodukteve të mishit për të përmirësuar teknologjinë e prodhimit, në hotele për të përmirësuar shërbimin etj. Znj. Wesely tha se ka edhe shumë më tepër potencial për biznese dhe sektorë të tjerë në Shqipëri që mund të përfitojnë nga kjo mundësi.

Angazhimi i një eksperti nga SES kalon në disa faza, që janë: kontakti i parë, kërkesa, vlerësimi i projektit, kërkimi dhe sugjerimi i ekspertit, konfirmimi nga kompania i kërkesës, përgatitja e misionit, misioni, vlerësimi, aktivitete dhe misione pasuese.

Burimi: monitor.al

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #34 - Mars 2024

Për një vit të mbarë!

Viti 2024 ka nisur me sfidat dhe mundësitë e tij. Ndërsa kompanitë do të duhet të përballen me disa ndryshime ligjore dhe njëkohësisht trendet e tregjeve: si rritje çmimesh dhe rritje e kostos së fuqisë punëtore, startupet janë para mundësive dhe një klime favorizuese. Thirrje të shumta janë hapur në fushën e biznesit, kulturës dhe ideve të gjelbërta. Ndër më të rëndësishmit, programi i qeverisë për financimin e 80 startupeve në tre faza zhvillimi të tyre

Për të kuptuar rëndësinë e bizneseve të reja, veçanërisht në teknologji, mjafton të shohim që edhe sipërmarrje të konsoliduara vendase, si një grup kompanish si Balfin, kanë një vëmendje të theksuar tek startupet. Z. Samir Mane, President i këtij grupi, prej kohësh ka treguar interes, duke i mbështetur, por edhe duke investuar në një prej startupeve që pritet të sjellë revolucion në bio-inxhinieri. Vëmendja tek risia dhe inovacioni vlerësohet të jetë një nga arsyet kryesore, përse audienca jonë e zgjodhi në kompeticionin tonë të dhjetorit si Sipërmarrësi i Vitit. Në një intervistë ekskluzive, z. Mane tregon për ne copëza domethënëse nga …

Shiko më shumë
Na ndiqni në rrjetet sociale
0