Shqipëria është tërësisht e varur nga hidrocentralet, pasi ende nuk ka plantacione me erë, ndërsa impiantet e energjisë diellore po instalohen ngadalë.
Kjo ka bërë që thatësirat dhe kriza energjetike për më shumë se një vit të rrisin borxhin publik, për shkak të importeve jashtëzakonisht të shtrenjta.
Shqipëria synon të bëhet një lider energjetik në rajon dhe një eksportues neto i energjisë deri në vitin 2030, sipas zëvendëskryeministres dhe ministres së Infrastrukturës dhe Energjisë, Belinda Balluku në prezantimin e konferencës vjetore.
“Më tej, 55 projekte janë në pritje të miratimit nga Ministria e Infrastrukturës dhe Energjisë, tha Balluku, ndërsa në 2021-in u dhanë vetëm 7 leje për energjinë e rinovueshme. Sipas saj, kapaciteti i përgjithshëm që pritet të instalohet është 1.7 GW, me vlerë 1.1 miliardë euro. Qeveria gjatë vitit të kaluar ka miratuar shtatë projekte, me kapacitet total prej 300 MW dhe në vlerë të përbashkët 180 milionë euro”.
Gjatë këtij viti, Shqipëria do të nisë edhe një projekt gazifikimi. Korça pritet të jetë qyteti i parë që do të ketë një rrjet gazi, e ndjekur nga Fieri. Këto qytete u zgjodhën për shkak të afërsisë së tyre me Gazsjellësin Trans Adriatik (TAP). Qeveria ka miratuar edhe një marrëveshje me Azerbajxhanin për të mundësuar financimin e projektit.
Një tjetër projekt me rëndësi kombëtare është ndërtimi i hidrocentralit të Skavicës, i cili pritet të nisë në Nëntor. Zëvendëskryeministrja vlerësoi se projekti do të kushtojë 500 milionë euro dhe do të zhvillohet brenda pesë viteve.
Energjia, “me sytë” nga vetëprodhimi. Instalohen 570 impiante, 80% zotërohen nga bizneset
Numri i paneleve diellorë të instaluar për vetëprodhimin e energjisë është në rritje të ndjeshme. Deri në fund të muajit Tetor, u instaluan 570 impiante. Sipas të dhënave nga Enti Rregullator i Energjisë, 80% e tyre u përkasin bizneseve, ndërsa pjesa tjetër, prej 20% u takon konsumatorëve familjarë. Fuqia totale e instaluar arrin në 55 MW, ndërkohë që janë edhe 200 kërkesa të tjera që presin miratimin nga institucionet përgjegjëse. Interesi i shtuar për vetëprodhimin e energjisë nga bizneset, ka ardhur pas nxjerrjes së tyre në tregun e liberalizuar në janar të këtij viti, që solli përballjen me çmime të larta të energjisë.
Artikulli u publikua më parë në faqen 26 të numrit 31 të revistës Business Magazine Albania. Business Magazine Albania është revista e parë digjitale me përmbajtje origjinale në shqip të orientuar nga fusha e biznesit. Ju mund Abonoheni dhe të Shfletoni Këtu nr. 31 të saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
