Mjekët kanë mirëpritur një arritje të madhe në fushën e mjekësisë, e cila do të lejojë injektimin e robotëve të vegjël në trupin e njeriut për të kryer detyra të ndërlikuara. Një ekip shkencëtarësh ka krijuar nanorobotë magnetikë të përbërë nga ilaçe për koagulimin e gjakut, të mbuluar me një shtresë që shkrihet në temperatura të caktuara.
Kjo teknologji mund të hap horizonte të reja në mjekësi, njoftuan shkencëtarët. Në një studim të udhëhequr nga Departamenti i Inxhinierisë në Universitetin e Edinburgut, hulumtuesit treguan se kjo teknologji mund të përdoret për të trajtuar gjakderdhjet në tru të shkaktuara nga aneurizmat, të cilat shkaktojnë rreth 500,000 vdekje në të gjithë botën çdo vit.
Ata injektuan disa qindra miliardë nanorobotë, secili rreth një e njëzeta e madhësisë së një qelize të kuqe të gjakut, në një arterie, dhe më pas i udhëhoqën në distancë drejt vendit të aneurizmës duke përdorur magnet dhe imazheri mjekësore.
Pasi ushtria e robotëve të vegjël mbërriti në vendin e caktuar, hulumtuesit përdorën magnet për t’i grupuar dhe për t’i ngrohur deri në pikën e shkrirjes së mbulesës së tyre, duke lëshuar ilaçin në pikën e saktë ku mund të ndalonte ose parandalonte gjakderdhjen në tru.
Aneurizma është një fryrje e mbushur me gjak në një arterie të trurit, e cila mund të çajë dhe të shkaktojë gjakderdhje fatale ose të çojë në goditje në tru dhe paaftësi të përhershme. Dr. Qi Zhou nga Shkolla e Inxhinierisë në Universitetin e Edinburgut, i cili bashkë-udhëhoqi studimin, tha: “Nanorobotët pritet të hapin horizonte të reja në mjekësi, duke na mundësuar të kryejmë riparime kirurgjikale me më pak rreziqe sesa trajtimet tradicionale dhe të shpërndajmë ilaçe me saktësi në zona të vështira për t’u arritur në trup. Studimi ynë është një hap i rëndësishëm drejt përdorimit të këtyre teknologjive për trajtimin e gjendjeve kritike mjekësore në një ambient klinik.”
Lexo edhe: “Meta Connect 2024”: Prezantohen “Orion”, syzet më të avancuara në botë!
Hulumtuesit theksuan se studimi tregoi se nanorobotët kanë potencialin të transportojnë ilaçe në vendet e sakta pa rrezikun që ato të shpërndahen në qarkullimin e gjakut, një test kyç për sigurinë dhe efikasitetin e teknologjisë.
Ata gjithashtu thanë se nanorobotët mund të zvogëlojnë nevojën për implante në trajtimin e aneurizmave të trurit, si spiralet apo stentat (tuba rrjetë).
Në këtë mënyrë, ata thanë se kjo do të ulte rrezikun që implantet të refuzoheshin nga trupi dhe do të pakësonte përdorimin e ilaçeve për koagulimin e gjakut, të cilat mund të shkaktojnë gjakderdhje dhe probleme në stomak.
Ata shtuan se shpesh duhen orë kirurgji të ndërlikuar për të vendosur një implant në aneurizëm, për shkak të nevojës për të kaluar një rrjet kompleks enësh të vogla të gjakut në tru. I njëjti ekip ka zhvilluar gjithashtu nanorobotë për të hequr mpiksjet e gjakut, duke treguar potencialin e tyre edhe në trajtimin e goditjeve në tru.
Studimi, i botuar në revistën e nanoshkencës dhe nanoteknologjisë “Small”, u udhëhoq nga një ekip nga Mbretëria e Bashkuar dhe Kina.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
