Fitimet vjetore të kompanisë Shell janë dyfishuar, duke arritur një rekord prej afro 40 miliardë dollarësh. Po ashtu konsiderohet si fitimi më i lartë në historinë 115-vjeçare të gjigandit të naftës dhe gazit. E gjitha pasi rritja e çmimeve të gazit me shumicë të lidhura me luftën në Ukrainë rriti performancën e kompanisë teksa konsumatorët nxituan për të paguar faturat e mëdha të energjisë.
Kompania e naftës dhe gazit shënoi fitime prej 9.81 miliardë dollarësh në tremujorin e fundit të vitit të kaluar, krahasuar me 6.4 miliardë dollarë një vit më parë. Kjo i ka çuar fitimet vjetore në 39.87 miliardë dollarë, duke tejkaluar 19.3 miliardë dollarë të shënuar në vitin 2021. Sakaq, analistët kishin pritshmëri që shefi ekzekutiv Wael Sawan, të raportonte fitime të rregulluara prej 7.97 miliardë dollarë për tremujorin e katërt dhe 38.17 miliardë dollarë për vitin.
Përpos fitimeve, Shell-i ka njoftuar edhe një pagesë prej katër miliardë dollarësh për aksionarët, përmes një programi të ri të riblerjes së aksioneve gjatë tre muajve të ardhshëm. Kompania ka përfituar nga ulja e furnizimeve ndërkombëtare me gaz, e cila filloi në vitin 2021 dhe u përkeqësua nga pushtimi i Rusisë në Ukrainë, vitin e kaluar.
Gjatë vitit 2022, rritja e fitimeve të kompanisë dhe konkurrentëve të saj e shtyu qeverinë të vendoste një taksë të papritur për operatorët e Detit të Veriut, e cila më vonë u ashpërsua nga kancelari Jeremy Hunt. Në tetor, Shell-i u kritikua kur njoftoi se nuk kishte paguar asnjë taksë të papritur në Mbretërinë e Bashkuar deri në atë pikë.
Muajin e kaluar, kompania ka njoftuar se priste të merrte një goditje prej rreth 1.7 miliardë paund në fitimet e saj për tremujorin e fundit të vitit 2022 si rezultat i taksave të papritura në MB dhe BE.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
