Shazam, tani me një pronar të ri

Apple njoftoi se ka përfunduar blerjen e Shazam, një aplikacion muzikor gjerësisht i përdorur dhe më i vlerësuari për sa i përket muzikës.

Shazam është një aplikacion për zbulimin e muzikës dhe aktualisht ka më shumë se 100 milionë përdorues aktivë mujorë dhe është shkarkuar mbi 1 miliard herë në mbarë botën. Përdoruesit mund të zbulojnë dhe të identifikojnë këngë me vetëm disa klikime.

“Apple dhe Shazam kanë një histori të gjatë së bashku. Shazam ishte një nga aplikacionet e para i disponueshëm kur lançuam App Store dhe është bërë një aplikacion i preferuar për fansat e muzikës në mbarë botën,” tha Oliver Schusser, zëvendës president në Apple Music, në njoftimin për shtyp.

Lexoni: Si u prit eventi i Apple?

Flitet se kjo blerje ka kushtuar rreth 400 milionë dollarë.

Kur Apple përmendi planet e tij për të blerë Shazam për 400 milionë dollarë në dhjetor 2017, rregullatorët e BE filluan një hetim mbi këtë blerje.

“Në këtë fazë, Komisioni është i shqetësuar se, pas marrjes së Shazam, Apple do të merrte qasje në të dhëna komerciale të ndjeshme për klientët e konkurrentëve të saj. Qasja në këto të dhëna mund t’i lejojë Apple të drejtojë drejtpërsëdrejti klientët e konkurrentëve të saj dhe t’i inkurajojë ata të kalojnë te Apple Music. Si rezultat, shërbimet konkurruese të transmetimit të muzikës mund të vihen në një disavantazh konkurrues “, thuhet në njoftimin për shtyp të BE.

Pavarsisht skepticizmit, Bashkimi Europian së fundmi e miratoi këtë blerje.

Përdoruesit në mbarë botën identifikojnë këngë duke përdorur aplikacionin Shazam mbi 20 milionë herë çdo ditë. Përveç kësaj, aplikacioni i ndihmon njerëzit të ndajnë video, audio ose përmbajtje të printuar në pajisje dhe mediume të ndryshëm.

Apple ka plane për të integruar aplikacionin Shazam me muzikën Apple. Tani për tani, Apple synon ta bëjë Shazam pa reklama. Kjo do të sigurojë që përdoruesit të jenë në gjendje të shijojnë muzikën, pa ndonjë ndërprerje.

/Apple