Programi i Vetëpunësimit hap fazën e dytë të aplikimeve duke ftuar të gjithë të rinjtë deri në moshën 30 vjeç të aplikojnë me idetë e tyre të biznesit për të fituar mbështetje teknike, financiare dhe ligjore. Pas përfundimit të suksesshëm të fazës së parë e cila konkludoi me mbështetjen e 38 të rinjve për t’u vetëpunësuar duke regjistruar biznesin e tyre, programi rifillon gjithçka nga e para sërish për idetë e reja të biznesit të cilat kërkojnë mbështetje.
“Numri i madh i aplikimeve që patëm në fazën e parë por edhe kontakti me kandidatët gjatë procesit na bëri të kuptojmë potencialin e të rinjve shqiptarë për të krijuar vetë vendin e tyre të punës dhe sesi ky program mund t’i ndihmonte ata. Idetë ishin interesante dhe një pjesë e tyre kaluan në fazat e mëtejshme të procesit, duke i konkluduar ato në modele reale biznesi,” shprehet Dajna Sorensen, përfaqësuese e programit të vetëpunësimit, i mbështetur nga PNUD në Shqipëri.
Gjatë fazës së parë të programit aplikuan mbi 400 të rinj nga e gjithë Shqipëria. Etapa e parë përzgjedhëse vlerësoi idetë e 103 aplikuesve të cilët filluan trajnimin për ta kthyer idenë e tyre në një sipërmarrje të vërtetë. Përgjatë 40 orëve të trajnimit, pjesëmarrësit u përballën me mundësi dhe sfida. Ata u trajnuan nga sipërmarrës të sukseshëm për t’u njohur dhe përdorur instrumenta konkretë, si zhvillimi i prototipeve për të testuar idenë e tyre. Në pjesën e fundit të trajnimit, pjesëmarrësit mundën të testonin më tej qëndrueshmërinë e idesë së tyre nëpërmjet ndërtimit të një business model canvas, një finalizim i planit të biznesit.
Etapa e dytë përzgjedhëse vlerësoi 66 biznes plane mjaftueshëm të qëndrueshme për të hyrë në fazën e mentorimit. Kjo fazë mundësoi këshillimin personal të pjesëmarrësve me mentorë dhe ekspert për ҁështje me natyrë financiare dhe ligjore të biznes planit të tyre. Pjesëmarrësit u përballën sërisht me testimin e planit të tyre të biznesit dhe a do i mbijetonte ai ligjeve të ashpra të tregut. Jo të gjithë dolën të fituar nga testimi i fundit përpara etapës finale të programit, ku 38 biznes plane ishin tashmë gati për t’u regjistruar si biznese reale.
Në këtë mes Dhjetori ndërkohë që aplikues të rinj po plotësojnë formularin e aplikimit, finalistët e fazës së parë janë duke hedhur hapat e tyre të parë si të vetëpunësuar. Dje kishin një ide, sot kanë një biznes.
Për më shumë informacion klikoni KËTU
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
