Treguesi i ndjesisë ekonomike (TNE) iu rikthye rritjes në muajin gusht, pas frenimit të ndjeshëm që kishte pësuar në muajin korrik.
Sipas rezultateve të vrojtimit të Bankës së Shqipërisë, TNE u rrit me 2.1 pikë krahasuar me muajin korrik, ndërsa qëndron 14.1 pikë mbi mesataren afatgjatë.
Rritja e TNE-së u përcaktua nga rritja e besimit në sektorët e shërbimeve dhe ndërtimit, ndërkohë që besimi në bizneset e tregtisë dhe të industrisë, si dhe besimi konsumator regjistruan përsëri rënie.
Treguesi i besimit në ndërtim u rrit me 5.1 pikë përqindje në muajin gusht. Ky tregues qëndron rreth 30 pikë përqindje mbi mesataren afatgjatë. Rritja këtë muaj u përcaktua si nga vlerësimet më të mira për aktivitetin aktual ndërtues, ashtu dhe për nivelin e porosive aktuale. Pritjet për punësimin në këtë sektor janë në rritje, ndërsa ato për çmimet në të ardhmen janë në rënie.
Treguesi i besimit në shërbime u rrit ndjeshëm me 8.6 pikë përqindje në muajin gusht. Niveli i këtij treguesi qëndron në intervalin e vlerave më të larta historike, rreth 24.4 pikë përqindje mbi mesataren afatgjatë. Të dy komponentët përbërës të treguesit, ecuria aktuale e aktivitetit dhe niveli i kërkesës, kanë regjistruar rritje të fortë. Pritjet e bizneseve për çmimet në të ardhmen janë në rritje.
Treguesi i besimit të industrisë ra me pesë pikë përqindje në muajin gusht, i ndikuar nga vlerësimet jo optimiste për prodhimin aktual dhe për kontratat porositëse. Megjithatë, ky tregues qëndron 8.8 pikë përqindje mbi mesataren historike. Pritjet e bizneseve për prodhimin në këtë sektor dhe për çmimet që këto biznese do të vendosin në të ardhmen, janë në rënie.
Treguesi i besimit në tregti u tkurr me 2.8 pikë përqindje në muajin gusht, i ndikuar kryesisht nga vlerësime jo optimiste mbi ecurinë aktuale të biznesit. Megjithatë, bizneset e sektorit presin një rritje të porosive dhe të ecurisë së biznesit në të ardhmen e afërt. Niveli aktual i këtij treguesi qëndron rreth 12.5 pikë përqindje mbi mesataren historike. Pritjet për punësimin dhe çmimet në të ardhmen janë vlerësuar në rënie.
Treguesi i besimit konsumator vijoi të bjerë lehtësisht edhe në muajin gusht, me 0.5 pikë përqindje. Megjithë rënien e dy muajve të fundit, niveli aktual i treguesit mbetet 1.6 pikë përqindje mbi mesataren historike. Rënia e muajit gusht u përcaktua nga pritjet më pak optimiste për situatën financiare dhe blerjet në shuma të mëdha për të ardhmen. Pritjet për nivelin e përgjithshëm të çmimeve dhe punësimin në të ardhmen janë rishikuar për lart.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
