Ministrja Manastirliu: Plani ynë për periudhën vjeshtë-dimër

Ministrja e Shëndetësisë dhe Mbrojtjes Sociale, Ogerta Manasterliu, tha se ka filluar përgatitja për të përballuar situatën e vjeshtë-dimrit. Ajo apeloi  për respektimin e rregullave që parandalojnë përhapjen e COVID-19 duke theksuar se nëse ato respektohen nga të gjithë, do të jetë më e lehtë për ta kontrolluar situatën.

Në një mesazh drejtuar qytetarëve ajo kujtoi se prej më shumë se 140 ditësh personeli shëndetësor po punon vazhdimisht, ndërsa njoftoi se ekspertët e shëndetësisë kanë përgatitur edhe planin se si do të menaxhohet periudha vjeshtë-dimër në vendin tonë.

Lexoni: OBSH paralajmëron: Mund të mos ketë kurrë një vaksinë

“Një betejë e gjatë ka filluar prej më shumë se 140 ditësh në spitalin infektiv dhe në spitalin “Shefqet Ndroqi”. Dhe puna e ekipeve heroike, të mjekëve dhe infermierëve tanë po shpëton me qindra jetë njerëzish. Mjekët e familjes gjithashtu janë duke ndjekur shëndetin e mbi 1 mijë qytetarëve të prekur nga Covid-19,” – tha Manastirliu.

Për planin e përballimit të pandemisë gjatë periudhës vjeshtë dimër, ministrja shpjegoi se po punohet për:

• të fuqizuar kapacitetet spitalore në rrethe;
• të fuqizuar kapacitetet testuese dhe vaksinuese për grup-moshat më të rrezikuara;
• të krijuar skuadra të lëvizshme në Qendrën e Urgjencës Kombëtare;
• të krijuar personel për spitalet COVID-3 dhe COVID-4;

https://www.facebook.com/OgertaManastirliu/videos/663993024324649/

“Normaliteti i ri kërkon nga ne fare pak, shumë shumë pak! Të gjithë bashkë, duke respektuar rregullat e thjeshta, por jetëshpëtuese mund t’ia dalim! Asnjëherë nuk është vonë për të bërë gjënë e duhur! Filloje dhe ti nga vetja! Filloje sot,” – apeloi ministrja Manastirliu duke kujtuar mbajtjen e maskës dhe ruajtjen e distancës fizike si masat kryesore parandaluese të përhapjes së infeksionit.

Tashmë kemi hyrë në muajin e gjashtë të pandemisë, në Shqipëri janë raportuar 5,620 raste me COVID-19, prej të cilave 3,031 kanë mundur të shërohen, 2,417 mbeten ende mbartës të virusit ndërsa 172 persona kanë humbur jetën.