Ministria e Financave ka publikuar treguesit fiskalë paraprakë për tremujorin e parë 2016. Sipas një njoftimi për shtyp, të ardhurat e përgjithshme janë realizuar në masën 95.8 miliardë lekë, ose afërsisht 1.4 milionë lekë më shumë se plani 3-mujor i vitit 2016.
Të ardhurat nga Tatimet dhe Doganat, përfshirë kontributet e mbledhura nga DPT, u realizuan në vlerën 84,8 miliardë lekë, që do të thotë 12.4 miliardë lekë, ose 17.27% më shumë se 3-mujori i vitit të kaluar dhe 2.7 miliardë lekë më shumë se plani, ose 3.34%.
Sipas njoftimit, të ardhurat nga taksat doganore janë realizuar në vlerën 1.3 miliardë lekë, ose 2.51% më shumë se 3-mujori i vitit 2015 dhe një performancë 0.38% mbi planin e kësaj periudhe.
Të ardhurat nga akciza, vijon njoftimi zyrtar, janë realizuar në vlerën 8.5 miliardë lekë, ose 21.71% mëshumë se një vit më parë dhe 10.87% më shumë se plani.
Kjo ka ardhur si rezultat i rritjes së sasisë së cigares së importuar me 190 tonë, ose 44% më shumë krahasuar me të njëjtën periudhë të vitit 2015.
Të ardhurat nga renta minerale janë realizuar në vlerën e 536 milionë lekëve, -17.7% krahasuar me 3-mujorin e vitit 2015, duke reflektuar rënien drastike të çmimit të naftës bruto në tregun ndërkombëtar.
Ndërsa të ardhurat nga TVSH-ja në import janë realizuar në vlerën e 21 miliardë lekëve, çka do të thotë se kontributi në të ardhura nga ky zë është 4.98% më shumë se 3-mujori i vitit 2015 dhe një realizim i planit në masën 99.8%.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
