Meta po krijon një divizion të ri brenda njësisë së saj Reality Labs për të zhvilluar robotë humanoidë të fuqizuar nga inteligjenca artificiale (AI), të cilët mund të ndihmojnë në detyra fizike, sipas një deklarate të brendshme të kompanisë të parë nga Reuters të premten.
Kompania mëmë e Facebook po hyn në fushën konkurruese të robotikës humanoide, duke iu bashkuar rivalëve si Figure AI, e mbështetur nga Nvidia, dhe Tesla, ndërsa përparimet në modelet e avancuara të AI po nxisin inovacionin në robotikë dhe automatizim.
Në deklaratë, Shefi i Teknologjisë në Meta, Andrew Bosworth, deklaroi se grupi i produkteve të robotikës do të fokusohet në kërkime dhe zhvillim për “robotë humanoidë për konsumatorët, me synimin për të maksimizuar aftësitë e platformës Llama”. Llama është seria kryesore e modeleve të AI të Meta-s, e cila fuqizon një gamë në rritje të produkteve të AI gjenerative në platformat e saj të mediave sociale.
Lexo edhe: String Albania ju pret në 18 shkurt në “Odoo Business Show – Tirana 2025
Ky grup do të drejtohet nga Marc Whitten, ish-CEO i kompanisë së makinave me vetëdrejtim Cruise, të cilin Meta e ka punësuar për këtë rol, sipas memos së Bosworth, e cila fillimisht u raportua nga Bloomberg News.
Kompani të mëdha të teknologjisë dhe startup-e po investojnë miliarda dollarë për të zhvilluar robotë të fuqizuar nga AI për prodhim, logjistikë dhe detyra shtëpiake, edhe pse përparimi ka qenë i ngadaltë. Kjo, sepse studiuesit kanë vënë re se arritjet në AI të lidhura me gjuhën, të cilat kanë ndihmuar zhvillimin e chatbot-eve, nuk kanë sjellë domosdoshmërisht përmirësime në kuptimin e botës fizike.
CEO i Tesla-s, Elon Musk, ka deklaruar se roboti humanoid i kompanisë, “Optimus”, mund të kryejë shumë detyra të përditshme dhe eventualisht do të shitet për konsumatorët.
Të enjten, Apptronik siguroi 350 milionë dollarë financim nga investitorë, përfshirë Google-in e Alphabet, për të zgjeruar prodhimin e robotëve të saj humanoidë të fuqizuar nga AI, të dizajnuar për detyra në magazina dhe impiante prodhimi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
