Nga Sheki Usein*
Nuk qëndrojmë larg asaj kohe kur meditimi do të bëhet aq i zakonshëm, njëlloj si pastrimi i dhëmbëve në mëngjes! Benefitet që sjell meditimi, qoftë në nivelin mendor, shpirtëror apo fizik, tashmë janë të konfirmuara edhe me shumë fakte shkencore.
Ndoshta për momentin, meditimi mund të duket edhe si një trend që po përhapet në shoqërinë perëndimore, si dhe në atë shqiptare.
Personalisht jam i bindur se kjo është shumë më e madhe sesa vetëm një trend. Meditimi, në kohën në të cilën jetojmë dhe performojmë, është padyshim një domosdoshmëri për një jetë të balancuar si dhe performim edhe më të sukseshëm në aktivitetet dhe punët që bëjmë.
Madje, ndonjëherë kam ndjesinë se të gjithë duhet urgjentisht të fillojnë të mësojnë meditimin, që të mbrojmë vlerat që kemi dhe duke evituar fenomene destruktive në shoqëri dhe biznes.
Lexo: “Kthesa e Madhe” libri i Sheki Useinit që ju nxit të jetoni jetën në maksimum
Meditimi do të na shpëtojë nga dinamika e vazhdueshme në jetë, tanimë me tendencë rritjeje, si dhe krijimin e një klime ndërnjerëzore me më tepër mirësjellje dhe mirëqenie.
Meditimi do na shtyjë të reflektojmë më qartë për veprimet tona të mëparshme dhe duke na mbrojtur nga vendimmarrjet e gabuara, të cilat mundet madje të na shtyjnë drejt një kolapsi të padëshiruar, qoftë në jetë apo në biznes.
Në të kundërt, shpejtësia jonë e të jetuarit do të bëhet aq e madhe, saqë shëndetin dhe biznesin mund ta dëmtojmë shumë rëndë, dhe kjo padyshim do të çonte në atë format që ne të bëhemi edhe më të pamëshirshëm ndaj vetes dhe të tjerëve, punonjësve, klientëve, miqve, partnerëve dhe nuk do mund të performonim me sukses në biznes.
Meditimi do të ofrojë një maksimum të ri për veprim në çdo sferë të jetës dhe biznesit, si dhe duke kuptuar më qartë përgjegjësitë në familje, respektimin e vlerave dhe strukturave menaxheriale në kompani, qasja më racionale ndaj produkit, klientit, shërbimit, mjedisit dhe shoqërisë në përgjithësi.
Meditimi, në radhë të parë, duke kultivuar, qetësinë dhe paqen e brendshme, nga ana tjetër do të eliminojë ngadalë betejën me veten, që në fakt është edhe kushti bazik për të mos qenë në betejë edhe me të tjerët, si dhe për të ndërtuar një jetë dhe shoqëri paqësore dhe të lumtur.
E gjithë kjo kontribuon në krijimin e një përvoje të bukur për secilin, me vlera të qëndrueshme, me më tepër mirëqenie dhe në përgjithësi marrëdhënie më të relaksuara ndërnjerëzore.
Meditimi ka ndihmuar shumë njerëz që të hapin horizonte të reja në jetë dhe në biznes, duke krijuar nga jeta dhe biznesi një histori suksesi.
*Sheki Usein, është një trajner meditimi, nxënës i përjetshëm i funksionimit të ligjeve të universit. Ai është themelues i vetvetja.com dhe do të vijë tek ne periodikisht me artikuj për meditimin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
