Hapësira virtuale ofron shërbimet në distancë për biznese dhe konsumatorë duke përfshirë jo vetëm pagesat utilitare, por edhe shitjen e produkteve të tilla si paketat e kredisë.
Nëpërmjet degës online të interesuarit për kredi të vogla lidhen në distancë nga telefoni ose interneti me operatorët e bankës. Në këtë mënyrë analizohet shuma e kredisë dhe të ardhurat e disponueshme nga klientët. Pasi realizohet e gjithë ekspertiza nga ana e bankës klientët vijnë vetëm për firmë në sportele.
Ekspertët në bankat tregtare pohojnë se degët online më së shumti janë të fokusuara për pagesat utilitare dhe faturat kryesisht. Gjithashtu ato japin asistencë për përdoruesit e shërbimeve bankare online se si mund të shfrytëzohet home banking.
Në 2016 numri i transaksioneve nga “Home Banking” u rrit me 27%, sipas Shoqatës së bankave.
Por me gjithë këto zhvillime hapësirat për të zhvilluar shërbimet e pagesa janë të mëdha. Një studim i posaçëm i Bankës Botërore tregon se vendet e rajonit, ku përfshihet edhe Shqipëria kanë akses të ulët në këto shërbime dhe veçanërisht Shqipëria paraqitet shumë dobët.
Siç shihet nga të dhënat krahasuese, Shqipëria ka numrin më të ulët të pikave të shërbimit për pagesa ndër 12 vendet e rajonit ECA, madje me diferencë shumë të madhe. Gjithashtu vendi ynë ka numrin më të ulët të ATM-ve. Situata dramatikisht ndryshe në aksesin në pagesa lidhet me faktin se institucionet e pagesave nuk janë të pranishme në zonat rurale të vendit tonë. Madje ato janë shumë të kufizuara jashtë rajonit Tiranë –Durrës.
Ekspertët ndërkombëtarë kanë analizuar se pagesat elektronike ofrojnë potencial të madh për të integruar familjet me të ardhura të ulëta. Nga këto shërbime prodhuesit bujqësorë, shitësit dhe segmente të tjera të marxhinalizuara të ekonomisë do të ulnin kostot.
Por, përdorimi i gjerë i pagesave elektronike kërkon përmirësime financiare, infrastrukturë komunikimi, ligjore dhe rregullative.
Burimi: insajderi.com
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
