Ka vende që na ftojnë të marrim frymë thellë, të ndalojmë në kohë dhe të ndjejmë ritmin e natyrës. Parku Natyror Drilon-Tushemisht, një perlë e gjelbër e fshehur mes maleve dhe liqenit të qetë, është një nga ato vende. Aty ku uji buron nga Liqeni i Prespës përmes Malit të Thatë burimi formon një basen ujor piktoresk i cili na tërheq drejt të gjelbrës, drejt natyrës.
Midis pemëve shtatlarta, shelgjeve që lotojnë, shpendëve fluturakë, ky park është një frymëmarrje për të gjithë ata që e vizitojnë. Por më shumë se kaq, është një trashëgimi, një dhuratë e natyrës që pret të kujdesimi për të.
Rijetësimi i një parku
Si gjithçka që jeton, edhe natyra ka nevojë për përkujdesje, për të lulëzuar sërish me të gjithë madhështinë e saj. Me një vëmendje të re ndaj biodiversitetit, parku po i kthehet origjinës së tij, duke ndjekur një qasje të bazuar në ekosistem. Rijetësimi i tij nuk është thjesht një projekt zhvillimi, por një premtim për të ardhmen, një hap drejt një ekuilibri të ri midis njeriut dhe natyrës. Duke mbjellë pemë autoktone, duke krijuar habitate të reja për shpendët dhe kafshët e egra dhe duke ruajtur florën e tij unike, Parku Natyror Drilon-Tushemisht po rikthehet në origjinë. Ky transformim nuk ndodh vetëm; ai ka nevojë për ne! Dhe ne kemi mundësinë të jemi pjesë e tij.
Mbill një pemë
Një pemë nuk është thjesht një rrënje që gjen strehë në tokë. Ajo është jeta që rritet me kalimin e kohës, një kujtim që mbetet, një dhuratë për brezat që vijnë. Duke mbjellë një pemë, ti nuk kontribuon vetëm në rritjen e parkut, por dhe në krijimin e një trashëgimie të re, të prekshme dhe të gjallë. Imagjino momentin kur do të kthehesh pas disa vitesh dhe do të gjesh hijen që ke krijuar, gjethet që vallëzojnë me erën dhe shpendët që gjejnë strehë mes degëve që dikur ke mbjellë vetë. Nëse dëshiron të lësh shenjën tënde në këtë parajsë natyrore, Parku Natyror Drilon-Tushemisht ka publikuar një listë të drurëve autoktonë dhe zonave ku mund të mbjellësh pemën tënde. Gjeje atë që të frymëzon dhe bëhu pjesë e një historie që do të jetojë ndër vite.
Vizito faqen zyrtare të parkut ose rrjetet sociale për të mësuar më shumë dhe për të zgjedhur pemën tënde. Është një dhuratë për natyrën, për veten dhe për brezat e ardhshëm!
Mbill një pemë! Lër një gjurmë! Kontribuo në ruajtjen e trashëgimisë!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
