Një nga aplikacionet më të përdorura nga të rinjtë, Snapchat, është vënë në shënjestër të autoriteteve europiane. Komisioni Evropian ka hapur një hetim zyrtar për të verifikuar nëse platforma po respekton rregullat strikte për mbrojtjen e fëmijëve dhe privatësinë online.
Lexo gjithashtu: Reddit nis verifikimin njerëzor për llogaritë e dyshimta
Hetimi lidhet drejtpërdrejt me zbatimin e Akti i Shërbimeve Digjitale (DSA), një nga ligjet më të forta të BE-së për kontrollin e gjigantëve teknologjikë.
Dyshimet janë serioze: Snapchat mund të ketë ekspozuar të miturit ndaj përmbajtjeve të rrezikshme, aktiviteteve kriminale dhe madje edhe tregtisë së produkteve të paligjshme. Një tjetër shqetësim i madh mbetet verifikimi i moshës, pasi autoritetet dyshojnë se sistemi aktual nuk garanton mbrojtje të mjaftueshme për përdoruesit e vegjël.
Sipas Komisionit, edhe cilësimet standarde të aplikacionit mund të mos ofrojnë nivelin e duhur të sigurisë dhe privatësisë, një problem që prek miliona përdorues në të gjithë Evropën.
Nëse shkeljet konfirmohen, pasojat mund të jenë të rënda: gjoba të majme dhe, në rastet më ekstreme, ndalim i plotë i funksionimit në tregun europian.
Nga ana tjetër, Snapchat ka nisur të reagojë. Platforma ka bashkëpunuar me kompaninë k-ID për të forcuar kontrollin e moshës. Një nga metodat përfshin verifikimin përmes selfie-ve, ku një softuer vlerëson moshën e përdoruesit.
Megjithatë, mbetet për t’u parë nëse këto masa do të jenë të mjaftueshme për të bindur BE-në, apo nëse një nga aplikacionet më të dashura nga adoleshentët do të përballet me pasojat më të rënda ndonjëherë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
