Kineton Albania – Startupi që po ndërton të ardhmen e industrisë automotive në Shqipëri!

Na tregoni pak për historikun e startup-it tuaj. Si lindi ideja dhe cilat ishin hapat fillestarë që ndërmorët për të krijuar këtë biznes?

Kineton Albania lindi nga dëshira për të kontribuar në zhvillimin e Shqipërisë, duke sjellë ekspertizë dhe inovacion në vend. Bashkëthemeluesi Dr. Mario Kazazi kthehet në Shqipëri pas 27 vitesh emigrimi, me një përvojë të pasur akademike dhe profesionale në fushat e inovacionit dhe teknologjisë. Duke besuar se një model biznesi që përfshin dhe fuqizon të rinjtë shqiptarë në zhvillimin dhe testimin e softuerit për industrinë automotive do të rezultonte i suksesshëm, ai nisi hapat e parë drejt themelimit të Kineton Albania. Për shkak se universitetet dhe kompanitë nuk ofrojnë ose parashikojnë formimin e një profili që përmban kompetencat e nevojshme të inxhinierit automotive, hapat fillestarë u përqendruan në krijimin e një akademie që zhvillon kompetencat e kërkuara nga industria dhe tregu evropian.

Cilat janë arritjet më të mëdha të deritanishme të startup-it tuaj?

Një nga arritjet më të rëndësishme është krijimi dhe formimi i brezit të parë të inxhinierëve automotive në Shqipëri, të cilët tashmë ofrojnë shërbimet e tyre për disa nga prodhuesit më prestigjiozë të automjeteve në Evropë, si McLaren, Stellantis, Aston Martin dhe Garrett. Kemi ndërtuar një ambient pune inovativ dhe motivues, ku çdo individ ka mundësinë të zhvillohet profesionalisht. Po ashtu, kemi vendosur bazat për një zhvillim të qëndrueshëm dhe vizion afatgjatë duke krijuar partneritete ndërkombëtare me ndikim të madh në industrinë tonë.

Si e shihni zhvillimin e startup-it tuaj në 3-5 vitet e ardhshme?

Në 3-5 vitet e ardhshme, synojmë të shndërrohemi në një qendër ekselence me reputacion evropian, duke zgjeruar ndjeshëm si stafin ashtu edhe të ardhurat. Për ta arritur këtë, do të forcojmë marrëdhëniet me universitetet, duke krijuar një urë të fortë midis arsimit dhe një karriere të suksesshme në industrinë automotive. Kjo përfshin organizimin e trajnimeve praktike të specializuara që ofrojnë përvojë të drejtpërdrejtë (hands-on) për studentët. Një element thelbësor i strategjisë sonë do të jetë investimi në Kërkim dhe Zhvillim (R&D), me fokus në trendet inovative në këtë industri si teknika të avancuara simulimi, integrimin e inteligjencës artificiale, dhe sigurinë kibernetike. 

Si e vlerësoni mbështetjen e qeverisë dhe institucioneve të tjera për startup-et në vendin tonë?

Mbështetja e qeverisë shqiptare për inovacionin ka qenë gjithnjë në rritje dhe kemi vënë re që industria automotive po merr nje fokus të veçantë. Ne kemi përfituar nga nisma të rëndësishme si Startup Albania, dhe besojmë se kjo mbështetje do të jetë e vazhdueshme dhe thelbësore për zhvillimin tonë. Gjithashtu, kemi pasur kontakte me agjenci të tjera që kanë shprehur interes për të bashkëpunuar me ne në projektet e ardhshme, gjë që na jep shpresë për rritje dhe përparim të mëtejshëm në industrinë automotive.

A keni ndonjë partneritet apo bashkëpunim që ka qenë kyç për zhvillimin e startup-it tuaj?

Po, partneriteti me Kineton Italia ka qenë vendimtar për suksesin tonë. Ky bashkëpunim na ka siguruar mbështetje në teknologji dhe ekspertizë teknike. Mbështetja ka rezultuar thelbësore për zhvillimin dhe formimin e profesionisteve te rinj në Kineton Albania, duke na mundësuar të ofrojmë shërbime të cilësisë së lartë. Për më tepër, kemi ndertuar marrëdhënie të forta me klientë ndërkombëtarë, ku ekipet e Kineton Albania janë angazhuar në zhvillimin e teknologjive për veturat e së ardhmes.

Lexo edhe:Gastronomët dhe personalitetet e vlerësuara në panairin e parë pan shqiptar në Berlin

Së fundmi, ju keni qenë një ndër startup-et e përzgjedhura për grantin e dhënë nga qeveria. Cilat janë projektet që keni në plan të realizoni me ndihmën e këtij granti?

Objektivi ynë është krijimi i një infrastrukture moderne për testimin dhe diagnostikimin e softuerit të automjeteve të së ardhmes. Me ndihmën e këtij granti, planifikojmë të hedhim hapin e parë drejt këtij projekti ambicioz, duke përdorur fondet për të blerë pajisje harduerike, licenca, si dhe për trajnimet e nevojshme. Këto do të na mundësojnë analizimin dhe testimin e rrjeteve CAN (Controller Area Network) dhe protokolleve të tjera të komunikimit automobilistik, si LIN, FlexRay dhe Ethernet. Ky investim do të jetë një hap kyç për ta pozicionuar Kineton Albania si një qendër teknike të avancuar në rajon.

Cila është vizioni juaj për të ardhmen e startup-it dhe si dëshironi që të kujtohet startup-i juaj në industrinë ku operoni?

Vizioni ynë është të ndërtojmë një qendër ekselence me ndikim të rëndësishëm në nivel ndërkombëtar, duke kontribuar në inovacionin dhe zhvillimin e industrisë automotive ne vend. Synojmë të jemi një pikë referimi për cilësinë dhe ekspertizën teknologjike në këtë fushë. Dëshirojmë që startup-i ynë të kujtohet si një kompani që ka ndihmuar në formimin e profesionistëve të rinj, duke u ofruar atyre një trampolinë drejt karrierave të suksesshme në industrinë automotive nderkombetare. Nëpërmjet angazhimit tone shpresojmë të kemi një ndikim të qëndrueshëm dhe pozitiv, duke përgatitur gjenerata të reja dhe sjellë ndryshime inovative në këtë industri.