Hapen aplikimet për programin e lidershipit LEAD Albania 2025

Fondacioni Shqiptaro-Amerikan për Zhvillim hap thirrjen për aplikime për Programin “LEAD Albania 2025”, i konceptuar sipas Programit të Shtëpisë së Bardhë për Lidershipin (White House Fellows Program) në Shtetet e Bashkuara të Amerikës.

Qëllimi i Programit në Shqipëri është që t’u sigurojë profesionistëve të rinj e të talentuar shqiptarë një përvojë njëvjeçare të drejtpërdrejtë në procesin e qeverisjes së Shqipërisë, shoqëruar nga një ndjesi e përfshirjes personale në lidershipin e shoqërisë sonë, duke e vendosur përfituesin pranë një pozicioni qeveritar shumë të lartë. Individëve të përzgjedhur do t’u ofrohet mundësia për të punuar në kabinetet e titullarëve të institucioneve të qeverisjes qëndrore në Kryeministri dhe Ministri, në Institucionin e Presidentit, në Bashkinë Tiranë, dhe në kabinetet e titullarëve të institucioneve qeverisëse të Sistemit të Drejtësisë: ILD, KLP, KLGJ, SPAK dhe Zyra e Prokurorit të Përgjithshëm.

Kjo përvojë pasurohet me një komponent edukimi, i cili do të shoqërojë eksperiencën e punës së përfituesve nëpërmjet seminareve dhe takimeve me temë si: integrimi evropian, politikat publike, vendimmarrja, politika të jashtme, politika të sigurisë, zhvillimi i kompentencave sociale dhe aftësive të lidershipit. Programi do të mbulojë për secilin individ të përzgjedhur shpenzimet që lidhen me pagën dhe përfitimet përkatëse, sipas kategorisë së pagave në institucionin ku do të vendosen.

Aplikimi kryhet vetëm online. Informacione të mëtejshme dhe udhëzimet përkatëse gjenden në faqen e internetit www.aadf.org/lead. Afati i fundit i dorëzimit të aplikimeve është data 22 Mars 2024, ora 17:00. Nuk do të konsiderohen të vlefshme aplikimet e paraqitura dorazi apo me email. LEAD-Albania