Industria e prodhimit të vezëve dhe pulave është prekur nga një sëmundje që ka shkaktuar ngordhjen e rreth 200 mijë shpendëve. Ministria e Bujqësisë ka njoftuar se Instituti Veterinar analizoi mostrat e marra dhe rezulton se ato janë prekur nga sëmundja e Laringotrakeitit Infektiv. Ministria vëren se kjo është një sëmundje që prek kryesisht shpendët dhe nuk transmetohet te njerëzit dhe as përmes produkteve ushqimore nga shpendët, ndaj nuk përbën rrezik për shëndetin publik.
Ministria thekson se, “Sigurojmë konsumatorët se deri më tani nuk ka asnjë rast ku të jetë shfaqur influencë aviare (gripi i shpendëve)”.
Dy pularitë e prekura kanë njoftuar Sektorin e Shërbimit Veterinar të Qarkut të Durrësit në Drejtorinë Rajonale të Veterinarisë dhe Mbrojtjes së Bimëve për procedurat që kanë ndjekur. Këto dy sipërmarrje u vendosën në karantinë deri në daljen e rezultateve laboratorike.
Lexo: Ndryshimi klimatik/ 100 miliardë dollarë dëme kanë shkaktuar fatkeqësitë natyrore në 2021
Në njoftim specifikohet se në subjektet e tjera shpendërritëse për vezë e mish, në të gjithë territorin e vendit, janë marrë masa të menjëhershme për parandalimin e përhapjes së sëmundjes dhe deri më tani nuk është raportuar asnjë rast.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
