Ishte një pyetje mjaft interesante e ngritur në Quora, në rrjetin social ku pyetjet përgjigjen nga njerëz të specializuar. Kjo pyetje morri përgjigje nga Andrew Ng, bashkëthemeluesi i platformës së edukimit online Coursera.
Kur vendosni të shpenzoni kohën tuaj, merrni parasysh dy kritere:
- Nëse ajo që po bëni, po ndryshon botën.
- Sa do të mësoni.
Edhe sot , këto dy kritere më ndihmojnë të vendos se si do ta shpenzoj kohën.
Shoqëria e sotme i jep mundësi të shumta individëve për të ndryshuar botën. Me zhvillimin e teknologjisë dixhitale dhe komunikimeve moderne, idetë dhe produktet mund të shpërndahen shumë më shpejt se më parë. Me ide të mira dhe ekzekutimin e duhur, çdo person mund të ndihmojë të tjerët në planetin tonë. Pyesni veten: Nëse ajo që po merreni ka një sukses të madh, a do të ndihmojë të tjerët? Nëse jo, kërkoni për diçka tjetër sepse ju nuk po përdorni gjithë potencialin tuaj.
Së dyti, kur jeni akoma të rinj, mos nënvlerësoni investimin në edukimin tuaj. Përkufizimi im për të rinjtë, është çdo individ më i vogël se 100 vjeç. Çdo gjë që mësoni do ju vlejë në të ardhmen. Gjithsesi kjo nuk do të jetë e lehtë. Kur ju nuk jeni më në shkollë, investimi në edukim nuk ka përfitime të shpejta. Ju nuk do të keni mësues që t’ju rrinë mbi kokë dhe t’ju motivojnë për të studiuar nëpërmjet vlerësimit. Gjithsesi nëse frymëzoni veten duke lexuar, duke menduar dhe duke folur me të tjerët për të mësuar gjëra të reja, atëherë për pak kohë do të jeni shumë të talentuar në fushën tuaj të studimit. Për veten time, unë e adhuroj leximin.
Unë kam mbi 1000 libra në Kindle dhe shpenzoj shumë kohë gjatë mbrëmjeve dhe fundjavave duke lexuar. Leximet e mia përfshijnë kërkime akademike, libra për strategji biznesi, inovacionin, produkte, biografi të njerëzve që adhuroj etj. Shpeshherë marr kurse online dhe diskutoj me njerëz që mund të mësoj gjëra të reja, qofshin këta miq apo të njohur. Proçesi i të mësuarit do t’ju ndihmojë të vendosni me çfarë të merreni në të ardhmen. Kur shikoni shembuj të tjerë se si ia kanë dalë të ndryshojnë botën, ju do të keni më shumë ide se çfarë duhet të bëni për ta ndryshuar vetë botën.
Për ta përmbledhur: Vazhdoni të investoni në edukimin tuaj, edhe kur është e vështirë. Vazhdoni të kërkoni se çfarë mund të jepni dhe kontribuoni për të ndihmuar njerëzimin.
/ Publikuar në Inc.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
