Sezoni i maratonave në Europë është tashmë në kulmin e tij. Të dielën, qytete të mëdha në kontinent dhe më gjerë do të mbyllin rrugët kryesore për t’i lënë hapësirën qindra e mijëra vrapuesve që do të nxjerrin në pah muaj të tërë përgatitje , qofshin këta në kërkim të një rekordi personal, një medaljeje të re, apo thjesht krenarisë për të thënë: “Unë isha aty”.
Ndërsa maratona të mëdha si ajo e Parisit dhe Vienës janë zhvilluar tashmë, qytete si Londra dhe Mançesteri do të ndalin qarkullimin këtë fundjavë për të pritur si profesionistët ashtu edhe amatorët që synojnë të përballen me sfidën e famshme 42.2 km.
Por çfarë ndodh realisht me trupin, mendjen dhe ndoshta edhe shpirtin gjatë një maratone?
Po, realisht do të bëheni më të shkurtër
Studime të ndryshme sugjerojnë se mund të humbisni deri në 1.25 cm në lartësi gjatë një maratone (mos u shqetësoni, zonja e zotërinj, kjo ka të bëjë vetëm me shtyllën kurrizore).
Kjo mendohet të ndodhë për shkak të tensionit muskulor dhe humbjes së lëngjeve mes disqeve kurrizore.
Mos e nënvlerësoni dehidratimin
Nëse hipni në peshore menjëherë pas përfundimit të garës, ka shumë gjasa të jeni disa kilogramë më të lehtë , nga djersitja e deri në 5 kg ujë.
Maratonat e organizuara kanë pika ndalimi për furnizim me ujë, përfitoni prej tyre.
Hidratimi ndihmon jo vetëm për të shmangur ndjesinë e marramendjes gjatë garës, por edhe për rikuperimin muskulor më pas.
Do të digjni shumë kalori
Një maratonë mund të djegë deri në 3,500 kalori, në varësi të gjatësisë, peshës, moshës dhe formës suaj fizike.
Kjo është arsyeja pse “carb-loading”-u (karbohidratet një natë më parë) është kthyer në rutinë për maratonistët.
Gjatë garës, trupi mbështetet kryesisht te karbohidratet dhe yndyrnat si burim energjie – ndaj xhelet energjetike janë kaq të përhapura për të rikthyer rezervat.
Lexo edhe: Pushimi nga lajmet negative ju ndihmon në shëndet/ Pse?
Por mos u çudisni nëse nuk keni uri pas garës
Në kilometri e 25-të keni ëndërruar të hani gjithçka që ju del përpara, por menjëherë pas garës, mund të mos keni aspak oreks.
Kjo lidhet me ndryshimet hormonale që ndodhin gjatë ushtrimeve intensive, për shembull, hormoni i urisë bie ndjeshëm, pasi trupi përqendrohet te zemra dhe këmbët.
Gjumi? Harrojeni
Keni kaluar një nga sfidat më rraskapitëse të jetës, por nuk mund të flini dot?
Faji është adrenalina, e cila qëndron e lartë edhe pas garës, si dhe kortizoli (hormoni i stresit), që ndihmon trupin të përballojë lodhjen ekstreme.
Çdo trup reagon ndryshe, por nëse keni pagjumësi, këta janë fajtorët më të mundshëm.
Gjymtyrë të enjtura, thonj të rënë dhe… gjinj që rrjedhin gjak
Të gjithë e presim që të kemi vështirësi për të ngjitur shkallët pas një maratone, por askush nuk ju paralajmëron për gjinj të përgjakur, fërkime në vende të paimagjinueshme, apo humbjen e thonjve të këmbës. Vrapimi, në fund të fundit, është një sport… i egër.
“Marathon Blues” – pas euforisë vjen një boshllëk
Disa ditë pas garës mund të ndiheni të zbrazët emocionalisht.
Pas muajsh të tërë përgatitjeje, një ndalesë e menjëhershme mund të sjellë një ndjenjë boshllëku dhe mungese qëllimi.
Ju gjithashtu mund të përjetoni një “zbrazje” psikologjike nga ndjesia e triumfit, një fenomen krejtësisht normal dhe njerëzor. Në fund të ditës, maratona është më shumë se një garë fizike, është një provë për mendjen, trupin dhe shpirtin. Dhe çdo kilometër i vrapuar ka historinë e vet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
