CEO i Reddit, Steven Huffman, ka dhënë një paralajmërim të drejtpërdrejtë ndaj Google, duke theksuar se platforma sociale tashmë funksionon si një “motor kërkimi de facto” për miliona përdorues. Komentet e tij erdhën pas publikimit të një raporti mbresëlënës financiar, ku aksionet e Reddit u rritën me 25%, duke nxjerrë në pah tensionet e reja mes dy kompanive në kohën kur Google po integron inteligjencën artificiale në produktin e tij kryesor të kërkimit.
Gjatë thirrjes së fundit për fitimet, Huffman deklaroi: “Ata që përdorin Google, do të përfundojnë në Reddit në një moment. Për shumicën e përdoruesve tanë, kjo tashmë është realitet, qoftë duke kërkuar drejtpërdrejt në Reddit, ose përmes një motori tjetër kërkimi. Praktikisht, kushdo që përdor Google sot, përfundon në Reddit.” Ai shtoi gjithashtu se këta përdorues shndërrohen lehtësisht në përdorues aktivë të Reddit, duke i përshkruar si “kërkues të pandalshëm.”
Lexo edhe: Tupperware – Rrënimi i një perandorie që dështoi nga suksesi
“Reddit”, një nga termat më të kërkuar në Google
Huffman theksoi se fjala “Reddit” është ndër termat më të kërkuar në Google, pasi gjithnjë e më shumë njerëz i shtojnë atë në pyetjet e tyre për të gjetur përgjigje autentike, të bazuara në përvoja njerëzore. I pyetur se si Google AI Mode, funksioni i ri që ofron përgjigje të gjeneruara nga AI në vend të listës së linkeve, mund të ndikojë te Reddit, Huffman pranoi se produkti i Google po “evoluon me shpejtësi” dhe kjo prek të gjithë ekosistemin digjital. “Google po teston shumë gjëra nga ana e tyre. Produkti i tyre po ndryshon me ritme të shpejta dhe kjo ka pasoja për të gjithë ekosistemin. Por një gjë mbetet themelore: arsyeja pse fjala Reddit është një nga më të kërkuarat në Google, është se përdoruesit në të gjithë internetin hyjnë në Google me synimin për të përfunduar në Reddit,” tha Huffman.
Deklaratat e Huffman sinjalizojnë qartë ambicien e Reddit për t’u shndërruar në një motor kërkimi më vete, duke u bazuar te forca e komuniteteve dhe përmbajtjes së krijuar nga përdoruesit. Ky zhvillim nënvizon një pikë kthese të rëndësishme: ndërsa Google po i kthen sytë nga inteligjenca artificiale për t’u ofruar përdoruesve përgjigje të menjëhershme, Reddit po pozicionon veten si destinacioni ku autenticiteti njerëzor mbetet avantazhi kryesor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
