Çelësi i një jete të përmbushur? Ndjenja se u vlen të tjerëve!

Në ditët e sotme, sidomos në periudha të ftohta dhe me pak dritë, është e lehtë të izolohemi dhe të mbyllemi në vetvete. Por kjo nuk na bën mirë. Sipas librit “Mattering: The Secret to a Life of Deep Connection and Purpose” të autores Jennifer Breheny Wallace, një nga nevojat më bazike të njeriut është të ndjejë se ka rëndësi për të tjerët.

Të ndihesh sikur nuk i vlen askujt mund të ketë pasoja serioze: izolim, sjellje vetëshkatërruese, agresivitet, madje edhe ekstremizëm në qëndrime. Shumë nga tensionet e sotme shoqërore janë, në thelb, përpjekje për t’u ndjerë i parë dhe i dëgjuar.

Çfarë do të thotë “të kesh rëndësi për dikë”?
Sipas studiuesve, ndjenja e vlerësimit ndërtohet mbi disa elementë të thjeshtë njerëzorë:

• të ndihesh i vënë re dhe i vlerësuar për atë që je, jo vetëm për atë që bën
• të dish që dikush ka nevojë për ty dhe të beson
• të ndihesh i rëndësishëm në jetën e të tjerëve, edhe në gjëra të vogla të përditshme
• të ndihesh i kuptuar dhe i dëgjuar
• të kesh njerëz që interesohen për ty dhe që edhe ti investon emocionalisht tek ata

Sot shumë marrëdhënie janë bërë “transaksione”: paguajmë dikë për gjithçka, kujdes për fëmijët, për të moshuarit, transport, ushqim. Kjo na ndihmon praktikisht, por nuk na jep ndjesinë emocionale që dikujt i vlen vërtet prania jonë. Marrëdhëniet nuk duhet të jenë vetëm shërbime, por lidhje njerëzore ku ka varësi dhe mbështetje të ndërsjellë.

Lexo edhe: Depozitat në lekë rriten në janar, euro bie, si po ndryshon sjellja e biznesit

Edhe kur ndihemi të lodhur dhe të mbingarkuar, ndihma e vogël ndaj të tjerëve nuk na harxhon gjithmonë energjinë. Përkundrazi, shpesh na jep më shumë kuptim dhe forcë. Energjia njerëzore nuk është si llogari bankare që shterohet, por si muskul që forcohet kur përdoret.

Për prindërit dhe kujdestarët, ndjenja e rëndësisë është shpesh e njëanshme: ata japin shumë, por nuk marrin gjithmonë mbrapsht të njëjtën vëmendje. Kjo sjell lodhje emocionale. Prandaj është e rëndësishme që ata të kenë njerëz të tjerë rreth vetes – miq, shoqëri – që i bëjnë të ndihen të parë, të kuptuar dhe të vlerësuar.

Vetëkujdesi nuk është egoizëm. Nuk do të thotë të mendosh vetëm për veten, por të mos harrosh nevojat e tua. Kur kujdesemi për veten, kemi më shumë energji për të qenë të pranishëm për të tjerët. Nuk mund t’u japësh të tjerëve atë që vetë nuk e ke.

Në fund, jeta nuk bëhet më e përballueshme vetëm me pushime të vogla apo rituale relaksuese. Ajo bëhet më e qëndrueshme kur kemi njerëz me të cilët lidhemi realisht, që na bëjnë të ndihemi të rëndësishëm dhe të vlefshëm.