Sfida e vërtetë për gratë është përfshirja ekonomike dhe financiare e tyre. Kryetarja e Këshillit të Bashkëpunimit Rajonal, Majlinda Bregu, ka dhënë një mesazh në ditën ndërkombëtare të grave dhe vajzave, duke theksuar se gratë janë kyçe në zhvillimin ekonomik, në shumë fusha, e mbi të gjitha në teknologji, ku hendeku i barazisë gjinore është edhe më i madh.
“Çelësi në zhbllokimin e potencialit ekonomik të rajonit janë gratë, të cilat vazhdojnë ende të luftojnë për të arritur sigurinë ekonomike”, thotë ajo në videomesazhin e saj.
Sipas Bregut, “Është e vërtetë se gratë dhe vajzat po marrin më shumë diploma universitetare krahasuar me meshkujt, por sërish vetëm 1 në 2 gra ose vajza në Ballkanin perëndimor ka një punë, apo është duke e kërkuar një të tillë. Çdo vit, ekonomitë e Ballkanit Perëndimor humbasin, mesatarisht 18% të Prodhimit të Brendshëm Bruto, si rrjedhojë e hendekut gjinor në tregun e punës. Kjo është më shumë se e gjithë ekonomia e Serbisë”.
Ajo fton vendet e rajonit të investojnë në fuqizimin e grave.
“Investimi në aftësitë e lidershipit të grave dhe vajzave është jetike. Nuk duhet parë si diçka dytësore. Ndihma ndaj grave dhe vajzave të rajonit për të përmirësuar aftësitë e tyre dhe për t`u përshtatur me një botë në ndryshim të shpejtë, do të jetë sfida e vërtetë për ne. Duhet të fokusohemi te edukimi financiar, përfshirë trajnimin dhe identifikimin e projekteve dhe shërbimeve të duhura, duke siguruar që gratë dhe vajzat t`i përdorin burimet e nevojshme financiare, si dhe të promovojmë biznesin e tyre”.
Për më shumë, ndiqni Videon.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
