Ambasadorja Yuri Kim ka marrë pjesë në Asamblenë e Përgjithshme të Dhomës Amerikane të Tregtisë.
Në fjalimin e saj përpara anëtarëve të dhomës së biznesit amerikan, ambasadorja u shpreh se Amerika ka dy projekte strategjike në Shqipëri me kompaninë Bechtel, që do ndërtojë hidrocentralin e Skavicës dhe kompanitë Exxon Mobile dhe Accelerate Energy, që do vënë në punë termocentralin e Vlorës me gaz amerikan.
Potencialet për bashkëpunime janë edhe më të mëdha sipas saj, por qeveria duhet të përmirësojë klimën e biznesit:
“Ambasada e SHBA ka tri prioritete në Shqipëri: demokracinë, mbrojtjen dhe biznesin. Ne jemi përqendruar prej kohësh në demokracinë dhe mbrojtjen dhe kemi një vrull të mirë në këto fusha. Jam e kënaqur që po udhëheq një shtysë për t’i ngritur marrëdhëniet tona të biznesit në të njëjtin nivel. Shtetet e Bashkuara janë ekonomia më e madhe në botë dhe është e qartë se në Shqipëri mund të përfitohet më shumë nga një lidhje më e ngushtë.
Lexo edhe: Huawei dhe Woman4Cyber Albania bashkë për sigurinë kibernetike
Mbetet ende më shumë punë për t’u bërë dhe ne i bëjmë thirrje qeverisë shqiptare t’i japë përparësi përmirësimit të klimës së biznesit për të zhbllokuar me të vërtetë potencialin që të gjithë e dimë se ekziston këtu. Reforma në drejtësi duhet çuar deri në fund në mënyrë që gjykatat të jenë të pastra, të drejtat e pronës duhet të trajtohen një herë e mirë dhe konkurenca e ndershme duhet të jetë parësore në mënyrë që të gjithë investitorët, të mëdhenj apo të vegjël, shqiptarë apo të huaj, të luajnë me të njëjtat rregulla të drejta dhe transparente.” – u shpreh Yuri Kim.
Dhoma Amerikane e Tregtisë në raportin e saj vjetor për klimën e biznesit në Shqipëri e ka vlerësuar në nivelin më të ulët që nga momenti i fillimit të matjes së indeksit 9 vite më parë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
