Nëse po poston në rrjete sociale dhe nuk po sheh rritje, shumë gjasa problemi nuk është algoritmi, por mënyra si po e ndërton marrëdhënien me audiencën dhe sa i qëndrueshëm je në kohë. Gary Vaynerchuk e shpjegon shumë thjesht këtë realitet për vitin 2026: suksesi në rrjete nuk vjen nga truke të shpejta, por nga disiplina për të qenë prezent çdo ditë, për vite me radhë.
Shumë njerëz ankohen se po postojnë rregullisht, por në realitet kanë publikuar një herë në ditë për disa javë dhe presin rezultate të mëdha. Rrjetet sociale funksionojnë ndryshe. Ato kërkojnë volum, durim dhe përmirësim të vazhdueshëm. Duhet kohë që njerëzit të të vërejnë, të të besojnë dhe të krijojnë lidhje me ty ose me brandin tënd. Nuk mund të ankohesh për mungesë rritjeje nëse nuk je gati të prodhosh për një kohë shumë të gjatë pa garanci për sukses të menjëhershëm.
Një nga gabimet më të mëdha është mënyra si trajtohen njerëzit që tashmë të ndjekin. Shumë duan më shumë audiencë, por nuk përgjigjen as te komentet dhe as te mesazhet. Në fillim të karrierës së tij, Gary u përgjigjej pothuajse të gjithëve dhe ndërtoi komunitetin duke krijuar marrëdhënie reale, një nga një. Ideja është e thjeshtë: nëse nuk i vlerëson ata pak njerëz që të ndjekin sot, pse do të dije t’i menaxhosh mijëra nesër. Nuk të duhen domosdoshmërisht miliona ndjekës. Një komunitet i vogël, por i angazhuar dhe besnik, është shumë më i vlefshëm se një audiencë e madhe, por e ftohtë.
Nga ana tjetër, shumica e njerëzve postojnë pak dhe vetëm në një platformë. Të qenit aktiv vetëm në Instagram apo vetëm në TikTok të bën të varur nga një algoritëm i vetëm. Vëmendja e njerëzve lëviz vazhdimisht nga një platformë në tjetrën dhe ajo që funksionon sot, nesër mund të mos ketë të njëjtin impakt. Për këtë arsye, prania në disa rrjete njëkohësisht rrit shanset për t’u zbuluar nga audienca të reja. Nuk ekziston koncepti i “postoj shumë”, sepse shumica e përmbajtjes shihet nga shumë pak njerëz. E rëndësishme është të postosh shpesh, të testosh formate të ndryshme dhe të përmirësohesh pak nga pak në mënyrën si prezanton mesazhin, sidomos në sekondat e para të videos, në tituj dhe në mënyrën si flet me audiencën.
Një tjetër element shumë i nënvlerësuar është dalja live. Transmetimet live krijojnë një lidhje shumë më njerëzore mes teje dhe audiencës, sepse njerëzit nuk shohin vetëm një video të montuar, por një person real që flet, reagon dhe ndërvepron. Algoritmet i favorizojnë këto formate sepse mbajnë njerëzit më gjatë në platformë dhe sjellin zbulim nga ndjekës të rinj. Nuk ka nevojë për skenar perfekt. Edhe një bisedë e thjeshtë, një moment nga përditshmëria, mund të krijojë më shumë besim se dhjetë postime të kuruara. Në vitin 2026, transmetimet live po kthehen gjithnjë e më shumë edhe në hapësira shitjeje direkte, ku njerëzit blejnë nga persona që u duken të vërtetë dhe të besueshëm.
Në fund, ideja kryesore është kjo: rritja në rrjete sociale është një lojë afatgjatë. Nuk fitohet me shpresë, por me punë të përditshme, durim dhe respekt për audiencën. Kush është gati të krijojë vazhdimisht, të flasë me njerëzit që e ndjekin dhe të eksperimentojë pa u lodhur, me shumë gjasa do ta shohë rezultatin. Jo menjëherë, por me kalimin e kohës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
